أنا بجبة ما حسبت إني غريب = لكني امثل جميع اهل الكويت
اليوم امثلهم وحفل الامس ذيب = مني تحية للطنايا بيت بيت
وعن ربعي الفضلان منزحت الحريب = قالوا تمثلنا اليا منّك حكيت
واليا تناسى ذكرنا العقل اللبيب = أنا كويتي واتفاخر بالكويت

من دار ابو ناصر مشينا مسايير = من شان دعوة مرسلين الرسايل
دار الصباح اهل الوجيه المسافير= أخوان مريم طيّبين الفعايل
دار الشيوخ المكرمين المشاهير = دار العرب من كل قاصر وطايل
ومشيت وهجوسي تدير التفاكير = واخترت للرحله خيار الرحايل
بنزن يديرنه عراض الزناجير = والنار تحرق شعلة القاز وايل
من عند شكمانه لهايب زمهرير = ومن عند صدامه تشوف الهوايل
تشبه شكامينه خشوم الخنازير= واليا همزت إسليتره تقل صايل
بساتمه تضبح تكل ضربحة ضير = وعقال سواقه يمين إمتمايل
هي منوة اللي يهتوون المشاوير = اللي يخلطون السرى بالقوايل
ولولا المرور ونحترم خطة السير= ثلاث ساعات وأنا وسط حايل
وصلت ديرة متعبين المباهير= أخوان نورة كاسبين النفايل
دار السعود مكسرين الطوابير = وقت اللوازم يكسبون الجمايل
ودستورهم قمّة جميع الدساتير = واللي يدوّر حق ماجاه مايل
حكم الشريعه حق ما فيه تزوير = ممنوع فيه التوريه والتحايل
مشوا على شرع النبي دون تحوير = من دور أبو تركي زعيم الدبايل
و سعود كمّل ما بنى دون تغيير = واصل مسيراهل الفعول الأوايل
وجاء دور من له بالسياسة تدابير = فيصل فصل بالراي ما به دغايل
وخالد يخلّد له رخا الأمن والخير = فعله شمل بالخير كل الفصايل
وجاء دور أبو فيصل حكيم التفاكير = فهد حكيم الراي واف الخصايل
نهضة بلد شّيد مصانع وتكرير= أسس قواعد ثابته ما تهايل
وغير المصانع نوّر العلم تنوير = ومن يزرع المعروف ما هو بزايل
و من عقبهم جاء للقيادة دميثير = كمّل مسيرتهم براي وفعايل
جاء دور أبو متعب حكيم التدابير = حلحيل شيال الحمول الثقايل
ريف الفقارا بالليال المعاسير = وفضله شمل من يستحق الفضايل
وأبو اليتامى واليدين المقاصير = ريفٍ لشعبه بالسنين المحايل
ذخر العرب بالراي ينشار ويشير= هداج ما يشبه نضيح الثمايل
والناس تاصف كل طيّب على الطير= والطير يوصف فيه وقت الصمايل
حرٍ تعلّى عاليات العناقير = يا هد صاد الطايرات الجلايل
وأرجع على ديرة هلي بالتعابير = وأحاول استرسل لو الفكر جايل
سلام مني و التحية و تقدير= يضفي على حايل وحكام حايل
سلام صافي يبتدي فيك يا أمير=يا سعود شوق معطرات الجدايل
حايل بعهدك طورت خير تطوير = تطوير شامل بالبنى و الفوايل
ولا انقص حقوق السابقين المشاهير= كلٍ بميزانه من الطيب كايل
وأثني على عضدك زبون المخاسير= عبدالعزيز اللي يغيث الهزايل
و عبدالله الخالد سلامٍ بتكرير= يخصكم يا ال السعود الحمايل
ويشمل على اللجنة وإذاعة وتصوير= وجميع من شارك بشتى الوسايل
ويضفي على الحضار شعب وشواعير = حضر وبدو يشمل جميع القبايل
ومني تحية عد رمل الحمارير = تختص أبو ممدوح يا قال قايل
مرزوق و اسمح لي على كل تقصير= اقبل عذاري يا عزيز النزايل
و إستاذن اللجنه وكل الجماهير= كلمة غزل يا متعبين السلايل
في حب من حطة بقلبي بواكير= بين الضلوع الموجفات النحايل
حبه حقيقي سمّر القلب تسمير= دايم إعيوني صوب حبي إتخايل
عنها نحاني في زماني مقادير= ما هو جفا منها رضيت البدايل
و أنا على شوفه دفعت التباشير= حيث إنها أحلى من جميع الآصايل
حبيبتي بين البني شكلها غير= درة فريدة من بنات العوايل
مكياجها قطر الندى و النواوير= وبخورها ريحة دسم شط حايل
وخمارها فعل الرجال المناعير = بالعصر هذا والعصور الاوائل
أجمل جميع المترفات الغنادير= و أحلى بنات الحاضره والقبايل
بنتٍ مهرها ما يجي بالدنانير = سقنا مهرها واحمر الدم سايل
فيها ثلاث إيمزينه عن الغير = يوم الفخر بموشمات الفتايل
منها طلع عنتر وأبو زيد وعمير = رمز الشجاعه مرملين الحلايل
أمّا الكرم من دون وردٍ و تصدير= حاتم وأخو سبلا كرام السبايل
رمز الكرم يوصف بهم وين ما دير= يوم البضايع والمواشي قلايل
وفيها لجا الكندي عن الحيف والضير= حتى سلم من حابلين الحبايل
وفيها السمؤل بالوفا حط له دير= بديار تيما يوم وقت الدخايل
وختامها يا محرقين المباخير= يمكن عرفتوا عشقتي بالدلايل
وما أقول باللي غيرها فيه تقصير = لكنّها ما ينوجد له مثايل
وعندي على ما قلت للعلم تبرير = لانها حالت على كل عايل
بفعل الرجال الشامخين المغاوير= وسود الجبال الشامخات الظلايل
عندي تعادل ما ملك بوش وبلير= وجميع ديره ما تجي مثل حايل