قصتنا لهذه الليله هو شاعر غني عن التعريف يتميز بالحكمه في شعره وهو من النبهان وبالتحديد من الرخيص
الشاعر / خلف أبو زويد وهذه قصيده له الله يرحمه ويبقيكم :
دخيـل خـذ مـن والـدك مسالـه=مسالـة مايفهمـه كـل رجــال
أحشم خويك عـن دروب الرزالـه=ترى الخوي عند الأجاويد له حـال
وخويك الداني ليـا شفـت حالـه=أحمل عليك من المعاليـق ماشـال
والمرجلـه بالـك ترخـي حبالـه=بالك تعيل ولاتراخـى لمـن عـال
ياصار دلـوك ماتموحـه شمالـه=ترى النشاما يجدعونه على الجـال
لياصار ماتدعي ليـا صـار قالـه=تحسب من حسبة هدومه به أزوال
ياعل رجل(ن) شوفتـه قـد حالـه=عسى تدور زوجتـه فيـه الأبـدال
الحمـره تـدرك معوشـة عيالـه=ياعاد مايبغى منـه بـاق الأحـوال
لو ربع يوم(ن) مقعـدك بالشكالـه=تسوى حياة عايشيـن بـه أنـذال
والبل يفتل مـن وبرهـن عقالـه=والخيل تربط بالشبيلـي والأقفـال
ليا صار لك من عوض الأنفى زماله=حمراء توردبك ليـا سـرب الـلال
تمرس كما تمرس خطات المحالـه=ليا صار مانت للمسة الخشم حمال
خله مـع الديـان تمشـي لحالـه=ليا صار مانت للمسة الخشم حمال
البيت هذا :
خله مع الديـان تمشـي لحالـه=ليا صار مانت للمسة الخشم حمال
جابه على قصه : لحق بالغزو مع رايس بن رخيص يوم نشب بتاليهم قالوا هذا أبو زويد لاحقنا قال واحد منهم كيف ياعزيانين والله كود نسرد يوم صار معنا خلف وكلمة نسرد معناها ( الخسارة نخسر ) وهو يحسبنه بعيد مايسمعهم وهو أثريه قريب عندهم ويسمعه يوم يقول هالكلام
زعل أبو زويد وحرف ذلوله قالوا وين ياخلف قال أنا ذلولي وسط وأبي أرجع قالوا لاترجع نردفك معنا أي نركبك معنا مارد عليهم ورجع يوم أبعد عنهم وجاء تالي النهار وهو يخايل نوب يقول غدينن أدور غدي الله يرزقن بخطافه أو بعير ضايع متطرف أو مايشبه ذلك ونوب يقول أبي أنكس يخايل بين ها ولا يوم أخذ يوم طلعت عليه هاكالنازع الصفراء متولجاته ثنتين لقحات ألايفه
أرقب يمار مايشوف أحد يوم راعى لهن يمار عليهن وسم الدهامشة قوم حمراء ( من حيث الشجاعه ) لقطهن يوم بغت تغيب الشمس يمار لاحقه راعي هاكالحمراء وهو ينحرف عليه وهو يطخه هاكالأطلاق وهو ينهزم وينفضخ قلبه سراهن هاكالليله والنازع ستر الله عليه ماولدت إلا عند أهله خذن لهن أيام ولدن كلهن
رجعوا الغزو اللي رجع منهم أبو زويد يمار ساردينهم الروله وراعي الكلمة اللي قال والله كود نسرد يوم صار معنا خلف
مذبوحة ذلوله وهو يروح يمه أبو زويد وهو يقضب يده قال روح أبيك تشوف هالنياق اللي رزقن الله بهن
وهم يجونهن مبركات بهكالروض وأحلبوا هكاللبن منهن وأصطحبوا
وقاله أبو زويد هالنياق ماجن إلا بجرة الله ثم جرتك قال وشلون بجرتي قال أبو زويد يوم ألحقكم وتقولي هكالكلمه ويوم أنا أرجع منكم زعلان وصارت يمنى رزقن الله بهالنياق مار الخلفة الشعلاء خذه عوض لذلولك قال والله مآ آخذه أنفشل وحلف عليه أبو زويد وراح به يدرج ولده وهاللي يقول لولده :
خله مع الديـان تمشـي لحالـه=ليا صار مانت للمسة الخشم حمال
قصة وقصيدة لخلف أبو زويد بن رخيص !! 
يـــــا مــــا حـــــلــــى هــــالـــــســـــالــــــفــــــة يــا ســـــاري 
العرض العادي
