البارحه جــونا ماطر= ومن "حولنا" النار مضويه
في روضة خريم خيمنا=شلة شـباب ٍ عزوبيه
الكل يضحك و"متهني"=ماللحزن عنـدهم "نيه"
الا انا اكسـر الخاطر =من سبّــتك يالشـقاويه
يابنــت ياللي تركتيني= ماتنــفعك هالمـزاجيه
المشكله عارف ٍ طبعك=لاتـدعين المثــاليه
لاكن عزاي الوحـيد اني=اغليك رغـم " الانـانيه"
لاجيت ابنساك اتــذكر=ذيك البـراءه الطفوليه
ايام عدَت وكــنا صغار =فينا الطـبايع سماويه
نضحك بلا قيد ونغني= احلى الاغـاني الشماليه
ماكنا نشعر بحجم الذنب!= وحنا نردد " يامـرعيه"
تتذكري زين ...ولازيد != تتذكري زين ... يابــنيه؟
الله واكبر ياذاك الوقت=ياحبنا للفضــوليه
ياما وياما تهــاوشنا= ياانتي بالحيل "شـريه"
وياما لعبنا بحارتكم= على "السيـاكل" ورجـليه"
تتذكري زين ...ولازيد!=تتذكري زين .... يابنـيه؟
نلعب سوى دوم غميمه=وأعد لك دون هــــــاالميه
وأدورك لين ماأتعب =وأقول وينــــــــــــك يافوزيه !!
أتذكرك.... تختبين.... بالحوش=بالعشه حـــــوله وحـــــواليه
والقاك صدفه بوسط البيت=متخــــــــــبيه بالدوانيه !!
تحت الدواشق وذيك الفرش=كنــــــــك من أيـــــام منسيه
أشد شعرك وانا مقهور=واقول قومــــــــي ياجنيه
تقولي "يعقوب" وشــ بك أنت؟=مافيك رحــــــــمه وماويه
حسيت "بالبرد" واتغطيت=بردانه بالحــــيل مو ليه
أثريني فجأه دفيت ونمت=وتوي دريـــت اني هنيه
تتذكري زين ... ولازيد!=تتذكــري زين.... يابـــنيه؟
بالطين ياما بنينا بيوت=ونمــرها كل عصـريه
وبالليل نسهر "انا" و"ياك"= على قصص هالحـراميه
تتذكري زين ... ولازيد!=تتذكــري زين.... يابـــنيه؟
تتذكري كنت " نصراوي"=وانتي بمــــيولك هلاليه
الموج الازرق وفارس نجد= افضل نوادي السعوديه
اليالتقوا اطربونا صح= وصار القاء فيه نديه
تتذكري زين ... ولازيد!=تتذكــري زين.... يابـــنيه؟
البارحه جـونا ماطر=ومن "حولنا" النــار مضويه
في روضة خريم خيمنا=شلة شـــباب ٍ عزوبيه
الكل يضحك و"متهني"=ماللحــزن عنــــدهم "نيه"
الا انا اكســر الخاطر =من سبّـــتك يالشـقاويه!!!