قصيدة رثاء الامير بدر بن عبدالمحسن لامه(الاميره سلمى السعود الرشيد) التي توفيت رحمها الله في 11سبتمبر1989م يوافق11صفر 1410ه وقد رثاها بهذه القصيده
مانشدت الشمس عن حزن الغياب = علمتنا الشمس نرضى بالرحيل
كل يوم يغرق الحظ اوعباب = ما سمعنا ناعي ما به عويل
وما هقيت الموت يجرحني جواب = لين شفتك في سما عمري اصيل
علميني يااللي كفوفك سحاب = وابتسامك غيث واهدابك نخيل
وش اسوي لا دخل فصل الضباب = وكفت عيوني وضيعني الدليل
حاجتي والشيب يهديني الصواب = حاجتي لك ما مضى بعمري حصيل
اّه يا سلمى مضى وقت العتاب = والحديث اللي بقوله لك طويل
اعتذر يمه حصل مني غياب = واعتذر ازريت لا ارد الجميل
من يجازيك وعطايك الشباب = والله العالم ترى ماني بخيل
يوم انا عاري غديتي لي ثياب = وان شكيت الضر شافيتي العليل
ويوم كبر الطفل ولمتي الذهاب = كل مافي الكون من طبع جميل
هي درت حايل وهذيك الهضاب = عن غيابك هو درى الروض المسيل
بنت من لا ثورو فوق الركاب = ما يباريهم سوى نصل واصيل
واخت من لاكسرت سمر الحراب = من عنيف الطعن ردو للصقيل
وأم من جداتهم مثل الشهاب = كاسبين المجد من جيل لجيل
ياالله المطلوب يا جزل الثواب = تجعل الجنه لها ظل ظليل
تقبلوا تحياتي
قصيدة رثاء الأمير بدر بن عبدالمحسن لأمه (الأميرة سلمى السعود الرشيد) 
العرض العادي
