اول سَنَه وَالعيد من دونك فـ[ دون ]=اول سَنَه للحزِن جَمر و وقايد
اول سَنَه مَاتَت بَعَد عينك عيون=والعين ماتذرف من الدمع جايد
اول سنه والليل لي بيت وركون=اول سَنَه للضيّق جَاه وعوايد
انشهد اني في مفارقك مطعون=والحزن للمحزون لِحف ووسايد
يفوح صدري فوح والقلب والنون=وفكرٍ يتّل معلقّات القصايد
ماعاد يعنيني مِن المُعضِلَه لون=اول سَنَه متني يَعَاف الشدايد
واللاّزمَه تنخى قَبل مَتني متون=واول سَنَه مانشتقي بالفرايد
واذا لفى مرسول ناسٍ يعزمون=اثني.. واجاهد نفس نفسي وازايد
واحضر واسلّم بعد اسلّم يهلّون=واجلس واسولف بين ربع وبدايد
وتطري ولا غيرك من الناس يطرون=واذا طريت يضيق وِسع البنَايد
اضحك واجامل والمعاليق يبكون=والناس تحسبني سعيدٍ واعايد
واكنّها فالصدر من خوف يدرون=وادوّر المسرى ولو كان كايد
واسري مع النجمه ولا جفّت جفون=ويصبح عليّ الصبح مثل العوايد
والله من مابي يقولون . . مجنون=ولا ارجي ورى بدع المثايل شهايد
ماعند ربي خير مِن مايظنون=ولاّ انت ماتوفيك شِرد الشرايد
عليك من ربي مخاييل ومزون=نوٍ ترازم من قريبٍ ونايد
يرحمك ربٍ رحمته تاسع الكون=ولاّ عباده ماوراها فوايد
والله لو ماني من اللي يصلون=ما ارضى بحكم الله واكب المعايد