يقول بدعي بن سمحان بعد وقعة الجميماء التي انتصرت فيها شمر على القبائل المتحالفه من عنزه وبني صخر والحويطات والشرارات وغيرهم :
راكبَ حر براسه زعانيف = يزها الدويرع والرسن والسفيفه
حر سبيق وعايزَ بالتواصيف = لولا حلايا الذيب يشدا هريفه
طلق الذراع زاهباً بالتكاليف = نسل الوضيحة من وضيحان اليفه
مرباعة اللبه بحد القفاقيف = ومقطانة التيم ونجدٍ مريفه
يلفي لمشعان راع العجاريف = راع النياق اللي زينٍ عنيفه
اللي خذوهم شمر بأول الصيف = يارسل قله يمحش افمه بليفه
غدوبهن أهل الرباع المشانيف = أهل النقا وأهل العراض العفيفه
ماهو إنت ياللي تضرب الجار والضيف = يالأسود ياللي مثل وجه الوصيفه
ترسل على الخطار جبان وخليف = وناسٍ يغث البال كثر تغليفه
واليا دوبحوا مثل النسور المهاديف = وثيابهم عن المصًنع لصيفه
ولياجا من الدحه يغلف تغاليف = متتيسٍ ربعه يقولون حيفه
ياأولاد وايل خيلكم صدرت عيف = وتطعينكم للقاع ماله خليفه
أقواكم الكيشه حمير المناتيف = أهل العراق اللي قليلٍ عريفه
ناسٍ مع النوري مصيبة هذاريف = أهل الحويِط والعلم والحليفه
وأذلهم الي يذل ويعز ويخيف = والناس عند الله جنود ضعيفه
شرابٍ خمرٍ مايهاب المياهيف = لوهو حصان كان عجلٍ جديفه
يبي بوجه يالي هل السيف = ويبي يالي نجد وحساها وقطيفه
ويبي ياخذ خزنة حايلٍ بالمناكيف = وديارنا ياكل خصابه وريفه
وجوه الرجال اللي تعرف المصاريف = وعاقوا نويه قبل ياصل مقيفه
مزنٍ نشا من حايلٍ له رفاريف = يمطر غضب وكل القبايل يخيفه
بسعود كساب الثنا مكرم الضيف = وعيا على كل البوادي مضيفه
وخواله اللي طوعوا نجد بالسيف = وردوا على كل البوادي سليفه
ياكربوا شحص المهار المزاغيف = حل القبل والجيش حول رديفه
يارددوا لقشوشهن والأطاريف = يلزم جموع الضد ويكثر جعيفه
الليل طرد وسرد والمال تجعيف = مع شمرٍ وحلو لجَة خليفه
وليا وقع عظوب زين التحاريف = ماني بحال المجعثن وبن شيفه
ياحيف ياالشعلان ياحيف ياحيف = صارت فوايدكم تحلل منيفه
وهي لجميع البدو مابه مصاريف = خطرٍ نجيك ثم عقبٍ تعيفه
الشاعر المرحوم ( بدعي بن سمحان الشمري) 
العرض العادي
