ياقصيدي وانت حملك مثل حمل السلاح = من صناعات الفض النزاع مطوره
خلق وجهك من حجا ضلع وإشراقة صباح = دم تجمد في وريده ودم تفوره
من خلالك لي على الكون منفذ وإنفتاح = أرسم أحلامي على واقعه واصوره
الحصون اللي عليها منصات الكفاح = إنشد أكبرهم من اللي بناه وسوره
سقت ذودك للمفالي وقاد من المراح = وإعترض في دربها نابحه ومخوره
النجاح يشيل جرحه من أعداء النجاح = والمثالية تعاني من المتهوره
والفتاوي تختلف شي حرام وشي مباح = وشي لو تقنع به العقل مايتصوره
نستمع لله وأكبر وحي للفلاح = المساجد عامره والقلوب منوره
وندري إن ماكل مذن بلال بن رباح = لو يقول الشمس حمرا والأرض مدوره
المهول لو خدعنا وخذنا بالصياح = واشتكى من رجله اللي مهيب تعوره
حيلة ما تمشى الا على الناس الصحاح = احبكتها عالم مهوله ومجوره
والطيور اللي تهاوى بمخلاب وجناح = لا تعشي صيدها واحد مادوره
مايحصل راحة البال وإطلاق السراح = من تورط له بخمسة صكوك مزوره
فرد حمزه حسب تقرير دايرة السلاح = فيه واحد غير حمزه هو اللي ثوره