السلام عليكم ورحمه الله وبركاته ..
أسعد الله اوقاتكم جميعا
كنت اسرعف في احد المنتديات ..
ولقيت واحد من الاعضاء كاتب معاناته ..
صح عليه خطمات بس عجبني
اذا ماكانت معاناه كل الشباب ..
اساسا الموضوع كان براسي بس شفت اني انزل كلام هالعضو لانه يتكلم بلسان معظمهم
==========================
أنا رجال عزوبي وما الله عطاني من الذرية الصالحه موظف وراتبي عليه من الأقصاد الشئ الكثير وتراودني هواجيس هاليومن أني أخربها وأعرس , مغير أتقلب على فراشي يمين ويسار وأطقطقها براسي كم مجموع التكاليف لو جزمت على العرس ..
يوم من الأيام جالس على المكتب وقاعد أكسر حسابات العرس بجوالي وحاط حرتي بالجوال , دخل علي واحد من زملائي بالعمل , سلم علي الرجال ما قصر العادة اللي يشوف وجهي ما يسلم يقول الحمدلله والشكر على العافيه المهم محاتسيكم خاش جو ملعون جدف ما رد السلام , عاد هو الله يصلحه وجه أبن فهره إذا جاء لازم حاجه تخرب أول ما طالعت في وجهه علق جوالي وطفأ أحووول , قال وش تسوي قلت مستظرفا أطير حمام وش أسوي شوفت عينك أطقطق بالجوال قال : والله من المقاطع عطنا عطنا قلت المقاطع خليتها لك أنا ر جال ناوي أعرس قال : خل عنك بس أنت وجهك وجه عرس قال : العرس يبيله مهر ومصاريف وشبكه و و و , عدد لي حاجات كثيره كنت ناسيها قفلها بوجهي قلت : أرتحت الحين يالبومه يوم قفلتها بوجهي لعنك الله أيها المخنز
بيني وبينكم الرجال صادق , الحين المهر لحاله سالفه طويله عريضه وما يكفيه قسط واحد والمشكله أن بعض هالشيبان عندهم من البنات إلى بكره ولو يجيهم واحد يخطب صمخوه بهاك المهر مع جبهته يطلع الولد مع الباب دايخ ومرتفع عنده الضغط والسكر ومنهار ما تشيله رجوله ويرقد أسبوع في المستشفى إحتمال يطلع وإحتمال لا . يا أخي أرحموا من في الأرض يرحمكم من في السماء والله أكاد أجزم أن ما قضى على الشباب في السعودية إلا مثل هالشيبان ومنهم على شاكلتهم عليهم من الله ما يستحقون ما أقول إلا الله أوكبر عليكم ,
طيب ماهيب مشكله المهر أدفعه مره وحده وأفتك منه لكن المصيبه هي مرحلة ما بعد المهر طلبات الأم وبنتها اللي ما تنتهي نسأل الله السلامة والعافية (عاد تحسبهم يعطون الواحد حقه الشرعي _ النظرة الشرعية _ ويشوف البنت قبل يجازف بحياته) !! أبدن ما يشوفها ولا يشم ريحتها مغير يمشي على عماها أن صابت صابت وإلا يبتل طول عمره في شك أنه متزوج أخو البنت
وبسبب طلبات الأم والبنت , الواحد خبره بعمره يوم الخطبه بحدود ال 27.. لكم الله ما تجي ليلة دخلته إلا وعمره يناهز الستين ربيع أعنبوهم طلباتهم ما تخلص أم البنت مواعين المطبخ مهيب عاجبتها تقول : أنهن موب صين يتكسرن بسرعه ( والله على حسب بنتس ورفالتها ) ,, البنت تكلم المجني عليه تقول له : حبيبي كنبات الصاله لونها يجيب الكتمه وهو بنفسه يقول : والله ما ندري منهو اللي يجيب الكتمه أم البنت تكلم أم الولد وتقول لها : شبكت بنتي ذهب أبيض مرصع بألماس وأنا أجزم لو تحرج على البنت وأمها ما جابو قيمته وصباحيتها طقم ما يقل قيمته عن عشر ألاف ريال ( وجه ماسك راسه من الصدمه ) والبنت مغير تناقز من مشغل إلا مشغل هذا صبغة شعر وهذاحمام زيت وهذا تقشير ( برتقال ) والمشكله شكلها هي هي ما تغير وكل هالمصاريف على ظهر هالضعيف الولد وهو حايس بسوق الغنم يدور على ذبايح
يعني الواحد ماتجي ليلة زواجه وصحة بخير إلا ملعون جدفه هذا غير كيسة الأدوية اللي معه شي للضغط وشي للسكر وشي للمرارة وشي للمرتيزم غير اللزقات اللي بظهره هذا وهو ما بعد دخل
إنا لله وإنا إليه راجعون
======
انا ابصم بالعشره ان كلام هالشاب صح ومعه حق في كل كلمه
ومو معناته اني انا بنت بقعد ادافع عن دلع البنات اللي هاليومين صاير موضه ..
قسم بالله انه يضيق صدري من تفكيرهن السقيم ..
كل وحده تقول انا عرسي يطق باصبع لعرس فلانه .. جابولي المهر وقدره ؟؟
الشبكه من المعلم
الفستان عند المصممه العلانيه
والضعيف الرجال يتحمطر يجمع الفلوس وياخذ من القروض
عشان كم ساعه فشخره ..
طيب هذي ماتفكر بحياتها مستقبلا ..
موب حاطه ببالها انا راح تتحمل الديون معه هالانسان ..
ماراح يتعرضون لازمات ماديه توقف بطريقهم
وكان بامكانهم يقللون منها بشكل كبير لو استغنوا عن هالشكليات التافهه
بصراحه عندي كلام كثير بس احس اني طولتها
تاركه لكم المساحه
اذا تهلهلت سنونك اعرست يابعدي ((نقاش)) 
العرض العادي
