هذه كلمات مسروقه من دفتر طفل كتبها بعامية اللغه..ودهشة السؤال.!
السبت فتحت عيوني..أدور عن نور..أمروني:<غمض>..و...غمضت..بعدها ما شفت لا ابيض ولا اسود!
الأحد كنت أسمعهم يقولون:< ألعن أبوك >, < يا حمار >,< يا حيوان >, < يا ثور >,< يا بقرة >,< يا لوح >,< يا اثول >...فتوقعت اني في حديقة حيوانات..فتحت عيوني ابى اشوف ( هالحيوانات ).. قالوا لي:"ما يصلح تشوف قلة أدب"..سألتهم:طيب..في عصفور؟؟
صرخوا في ويهي:< انطم وغمض >..!!
الاثنين سمحوا لي اشوف التلفزيون..كنت بروحي منسجم مع أفلام كرتون..دخلت امي .. وكان
ابو عائلة ادمز( يبوس أمهم ) .. ركضت امي ..غيرت القناة..وصرخت بأعلى صوتها.."عيب عليك..قاعد تشوف قلة أدب..!!" خزيتها بكل براءه وانا متعجب من اللي صار:"طيب وشنو صار؟؟أبوهم يبوس أمهم!.."قالت لي وهي معصبه وايد ( التبويس.. قلة حياء ) !!
بعدها بأسبوع..شفت امي تسلم على ام الجيران و( تبوووووسها )..قلت لها وانا كلي أسى"يا يمه ..التبويس قلة حياء!!.."
الثلاثاء كانوا بنات خالتي عندنا..وكنت الولد الوحيد اللي يلعب معهم..وأبوي بس يبحلق
عيونه فيني وين ما رحت ووين ما ييت..بعد ما راحوا..ناداني أبوي وقال:"عيب الواحد يقعد مع بنات..قلة أدب..!"
بعدها بجم يوم..كان أبوي قاعد مع عماتي..خزيته بطرف عين
( وتبون الصج نقدت عليه ).. وقلت له:" اللي يقعد مع بنات..قليل أدب " !!
الأربعاء كنت اسمعهم يقولون( صدام قوي )..وأعجبني...بعد الأزمه..قالوا( حرامي ومجرم )..سألتهم:شلون ؟؟!!..قالوا:"حرامي ومجرم..وبس..واسكت..!"
وكنت أسمعهم بعد يقولون ( جيم كاري..فاسد )..فكرهته على طول..وكانوا يشوفون أفلامه..ويضحكووووووون..كنت أسألهم"ليش تضحكون؟!..ما تقولون انه فاسد"...قالوا..ماتعرف
تنطم بس.!؟؟
الخميس أبوي يقول< التتن >حرام.. واللي يدخن يدخل النار..وفي يوم شفت ابوي قاعد مع صديقه أبو حمد..وأبو حمد ماسك السيجاره بيده..وقفت وسألت ابوي"" طيب اللي يجلس مع اللي يدخنون..يدخل النار بعد ؟!!!"
الجمعة أسمعهم يقولون..ان اللي يطول في مكالمته يغازل..واللي يروح للسوق يغازل..واللي يعرف انترنت يغازل...وامي تطول على التلفون,, وتروح للسوق,, وتطقطق على الكمبيوتر.. رحت لأبوي وانا مصدوووووووووم::" يبااااااااااا الحق..................... ..
أمي تغازل..!!!..!!..!!!!
منــقـــــــــــــــــــــــول
كلمات مسروقه من دفتر طفل 
العرض العادي
