ايامنا والليالي كم نعاتبها=شبنا وشابت وعفنا بعض الاحوالي
تاعد مواعيد والجاهل ما يكذبها=واللي عرف حدها من همها سالي
ان اقبلت يوم ما تصفي مشاربها=تقفي وتقبل وما دامت على حالي
في كل يوم تورينا عجايبها=واليوم الاول تراه احسن من التالي
ايام في غلبها وايام نغلبها=وايام فيها سوا الدهر ميالي
جربت الايام مثل من يجربها=تجريب عاقل وذاق المر والحالي
نضحك مع الناس والدنيا نلاعبها=نمشي مع الفي طوع حيثما مالي
كم من علوم وكم اداب نكسبها=والشعر مازون مثقال بمثقالي
اعرف حروف الهجاء بالرمز وكتبها=عاقل ومجنون حاوي كل الاشكالي
لاشك حظي ردي والروح متعبها=مافادني حسن تأديبي مع امثالي
ان جيت ابي حاجة عزت مطالبها=العفو ماحد من المخلوق ياوالي
قوم الى جيتهم رفت شواربها=بالضحك وقلوبها فيه الردا جالي
وقوم الى جيتها صكت حواجبها=وابدت لي البغض في مقفاي وقبالي
ماكني الا مسوي حال مغضبها=والكل في عشرتي ماكر ودجالي
ياحيف تخفي امور كنت حاسبها=واللي على بالهم كله على بالي
الجار جافي وكم قوم نحاربها=والاهل وصحابنا والدون والعالي
والروح وش عذرها في ترك واجبها =راح الحسب والنسب في جمع الاموالي
نفسي تبي العز والحاجات تغصبها=ترمي بها بين اجاويد وانذالي
المال يحيي رجال لاطباع ابها =كالسيل يحيي الهشيم الدمدم البالي
عفت المنازل وروحي يوم اجنبها=منها غنيمة وعنها البعد اولالي
لاخير في ديرة يشقى العزيز ابها=يمشي مع الناس في هم وذلالي
دار بها الخوف دايم ما يغايبها=والجوع فيها معه من بعض الاحوالي
جوعا سراحينها شبعا ثعالبها=الكلب والهر يقدم على كل ريبالي
عز الفتى راس ماله من مكاسبها=يامرتضي الهون لاعز ولا مالي
ذللت بالروح لين ارخصت واجبها=وانا عتيبي عريب الجد والخالي
قومٍ تدوس الافاعي مع عقاربها=لها عزايم تهد الشامخ العالي
كب المنازل وقل للبين يندبها=تبكي عليها بدمع العين هطالي
لا تعمر الدار والقاله تخربها=بيع الردى بالخساره وشتر الغالي
ما ضاقت الارض وشتبت شبايبها =من كل حرٍ مشهر في راس ما طالي
دارٍ بدارٍ وجيران نقاربها=ورض بأرض وطلال بأطلالي
والناس اجانيب لين انك تصاحبها=تكون منهم كما قالو بالامثالي
الارض لله نمشي في مناكبها=والله قدر لنا ارزاق واجالي
حث المطايا وشرقها وغربها=وقطع بها كل فج دارس خالي
اطعن نحور الفيافي مع ترايبها =وبعد عن الهم تمسي خالي البالي
من كل عملية تقطع براكبها=فدافد البيدا درهام وزرفالي
تبعدك عن دار قوم ودار تقربها=وختر لنفسك للمنزال مغزالي
لو مت في ديرة قفراً جوانبها=فيها لوطا السباع القبس مدهالي
اخير من ديرة يجفاك صاحبها=كم ذا الجفا ولتجالي والتحلالي
دس المخاطر ولاتخشى عواقبها=الموت واحد ولا عند الحذر جالي
ان المنيه اذا مست مخالبها =تدرك لو كنت في جو السما العالي
مافرت الاسد في عالي مراقبها=تسعي للارزاق ماحنت للاشبالي
والشمس في برجها والغيم يحجبها =تقفي وتقبل لها في الفلك مجدالي
رب السموات يامجري كواكبها=يامجري السفن في لجات الاهوالي
ضاقت بنا الارض وشتبت شبايبها=والغيث محبوس يامعبود ياوالي
يالله من مزنة هبت هبايبها=رعادها بات له في البحر زلزالي
ريح العوالي من المنشا تجاذبها=جذب الدلي من جبا مطوية الجالي
ديمومة سلبت ورخت ذوايبها=وانهل منها غزير الوبل همالي
تسقي ديارٍ عزيز الوقت حاربها =ماعاد فيها لبعض الناس مدهالي
ياجاهل اسمع تماثيل مرتبها=فيها معاني جميع القيل والقالي
شبه الدنانير تزها في قوالبها =في صرفها زايد عن قرش وريالي
ياربي توبه روحي لا تعذبها=بيوم القيامه اذا ماضاقت اعمالي
وزكى صلاة على المختار نوهبها=شفيعنا يوم حشر فيه الاهوالي

وهذه قصيدة السويح

عزه من عبرة كنت سواكبها =تقفي وتقبل بصدري قد برت حالي
مالي جدا كود تجذبني وجاذبها= تجرح بصدري بالاقفاهو والاقبالي
والنوم عيا يجي عيني محاربها=عيت تنام وتلذ بنومها الغالي
كن السماليل تغضي به مذانبها=والقلب يصلاه من ضيم الدهر صالي
من شوف دنيا تكدرلي مشاربها=بالهم والغم والضيقات بالبالي
كل يزايم لحمله من مصايبها =قد اثرت به جروح غيبها كالي
مازلت من ذا نشيت الا وانا اطلبها=وحفيت مانلت منها مثل ما نالي
ثورمريح ينعم من نوايبها=رزقه بها اشكال ياتي له بالاشكالي
كل على فعلها يمشي يعاتبها =تخفض الاعلى وتعلي سفل الانذالي
كم واحد دايم نفسه متعبها=يصبح ويمسي وكفه مفلس خالي
رايت انا الحرص ماهو اللي بيجلبها=ولا الجود يمنع لها ان جت بالاقبالي
لوطرت بين السما والارض تطلبها =غير الذي كتب لك ما نلت مثقالي
اخذ القنعات من دنياك ورض ابها=وجعل نصيبك بها في راحة البالي
وياساهر ويامهموم في نوايبها =لاتكترب فالفرج ياتي من الوالي
اسرع من العين تغضي ثم تقلبها =ويبدل الله من حال الي حالي
والدين لو تفتكر اعلا مكاسبها=اجهد بدينك بها وخلاص الاعمالي
ولا تحسب انك تعمر دايم ابها=من ظن هذا فهو اخبال وهمالي
ولا ذكر في صفة عيب لصاحبها=من عصر ادم من الاول الي التالي
وحسن الادب خير من رفعة مناصبها =وجود الفتى اخير من جمعه للاموالي
يقطعك من ديرة يشقى العزيز ابها =والنذل يمشي بها طرب ومختالي
فلا خير في الدار وان حل بجوانبها=قوم يرون العزيز بعين الاذلالي
ومن يوم انا اقفي تعلق بي شواذبها =بالكذب والبهت ترميني ولا تبالي
قوم ليا جتك يوم في نوايبها=والى تبلج وتضحك لك بالاقبالي
والاانت الى جيتها لقك غواربها =كنك مسوي بها ما يغلق البالي
اروغ بالايدي من مشذر ثعالبها=يوري كما بالضحى يوري لك الالي
لا خير فالعين تعمى عن معايبها =وتبصر بعيب الملا في كل الاحوالي
تبصر بعيبي وتعمى عن معايبها =بعيني تشوف القذا وبعينها جذالي
وذا الذي ذكرلك ازكى مناقبها=ولا بها شن يشيب روس الاطفالي
ماكلف الله نفس غير ما جبها=ا بعد عن الحيف حيث الحيف قتالي
ولارض جعلت لك ذلول مناكبها=تسعى وتقطع بها حل وترحالي
ما قرت الشمس في عالي كواكبها=ولها بالافلاك ترحال وتنزالي
وترى المنيه الى جت ماش يحجبها=لو كان دونك ثلاثين الف سردالي
ارحل عن الدار الى دبت عقاربها =عليك لو نبتها بالولو الغالي
ورحل عن الدار الى حل الثقيل ابها=وشاة سوء وحسادٍ ونقالي
كل على الموت صابر لو كواعبها=لو هن براس القصر ومشيد عالي
ودي بموتي على مرهن قواضبها =اشوى ولا موتي في ذل وتذلالي
مع ذا وياراكب وجنا براكبها =تقطع دياميمها خب وزرفالي
منجوبة عمقت بارفع نجايبها=فشخا المرافق سليم العظم مرمالي
مني تحمل وصايا كنت كاتبها =مني لمن هو وديع السين والدالي
ملفاك فرز الوغى مروي قواضبها=اعني ابراهيم زاكي الجد والخالي
تلقاه في ديرة قبلي كواكبها=دار عن الضد عدوها بالافعالي
ياصاحي ابدت لنا الدنيا عجايبها=كيف الفتى يقتله محبوبه الغالي
حسبت انا مي تعطف لي ذوايبها =يوم ادرك الموت نفسي والاجالي
ياصاحي افكر بروحي راح يجذبها=فان كنت مثلي فعزالك وعزالي
حلت بقلبي وثنت في ركايبها=لو زال خشم الرعن ما ظن ينزالي
هني نفس تنام والاش يتعبها=وهني من يذكر انه داله سالي
ياالله ياالله يامنشي سحايبها=يا منقذ النفس من الضيقه والاهوالي
لا توزي نفسي ولو لادنى قرايبها=بوجهك ياالفرد يارب الملا العالي
وصلاة ربي عدد ذاري سواكبها=على نبي الهدى والصاحب الالي

الشكر الجزيل ياسلمى

مرورك وتواجدك مما يشرفني ويسعدني وان دل هذا يدل على تمعنك في القصيدتين ومقارنتك لهما

ويوجد بالقصيده معاني لها اصل في الغه العربيه والدين الحنيف

علماً ان القصيده لم تنشر في الصحف لقلة تواجدها وموثقه بخط قديم لشاعر نفسه وهي تهم الباحثين

في الشعر اكثر

وشكرٍ لك