أنا محمد بن عقيل الفريدي=حربي وساكن في عروس الشمالي
كنز المراجل ممتلي به رصيدي=والصدق عندي يالبشر رأس مالي
وكل البشر مثلي ويمكن تزيدي=وما أقول أنا خير البشر والرجالي

الشعر عندي يالعرب له مكانه= أردده مابين نفسي وبيني
بيني وبينه لا بغيته ميانه=يترجم إحساسي برسمت يديني

-: متى تكتب القصيده ؟

لا حلت الفكره على البال نكتبّ=وقت الضحى والعصر وإلا بالأسحار
مادام في راسي علوم ٍ تقلبّ=سلمتها حبر القلم فوق الأسطار
وبدعت قاف ٍ من ضميري مرتبّ=قاف ٍ يبرهن داخل القلب وش صار

- : مطلع أول قصيده نظمتها ؟

جعل الليالي ياحبيبي تجيبك=واشوف زولك ياحياتي قبالي
تفرح بك الدنيا ويفرح حبيبك=ياروح قلبه ويابعد كل غالي

أنا أحمد الله ماتحسف على شيّ = مافات مات وكل شي ٍ بياتي
مادام راسي عايش ٍ قلت أنا حيّ = مافات يدفن والبقاء في حياتي
مافات من عمري ترى خبرة ٍ ليّ = أنفع بها نفسي على المقبلاتي
خمسه وعشرين ٍ ترى ماهي شويّ = ذي منوت اللي لابسات العباتي

تعال واقرب لاتحسف وأنا أبيك = يمكن تجي في يوم ترجي وجودي
دامي معك جالس واسولف واسليك = اضحك عساني فدوة ٍ للخدودي

قال النبي أمك أحق الصحابه = وكرر كلامه للبشر عد مرات
يعني تفطن للنبي معك كتابه = أمك بطاعتها تفوز الملذات

ترى الوطن غالي وحنا جنوده = نفديه بأرواح ٍ ليا جت للأرواح
يبطي عدوه ما دخل في حدوده = ويبقى العلم مرفوع مايوم ينزاح

ليت السهر ينفع ويجلا الهمومي = مير السهر بلوى على زود الأوجاع
أسهر وأحسب ساريات النجومي = وأقول عقلي وين والعقل منباع

صديقي الوافي مع الناس معروف = اللي على الشدات واقف يميني
هذا الصديق وغيره اليوم ماشوف = وإلا الرخا كل ٍ يروح ويجيني

من عظم قدره ماسكه في يميني = أكتب به أجمل ما سكن داخل الرأس
أكتب به أبياتي وقصة سنيني = وأترجم إحساسي على سطر قرطاس

الحبيبه بقلبي سر والله عميق = حالف ٍ لأحفظه مادام عيني تشوف
ماعرفها بعيد ولا عرفها رفيق = أسمها في ضميري حافظه بالحروف

يا ذا القمر وإن قلت يا حظ عينك = وسط السماء وتشوف ديرة حبيبي
جعل الولي يا ذا القمر مايهينك = وصل له إرساله وقل له يجيبي

مادام شعري من طلاقة لساني = ماندم على شعري ولا أقول ندمان

اللي وقع بالعشق بالعشق ينشب ّ = واللي سلم ياحظ قلبه وعينه
لا تسأل الدكتور وإسأل مجرب = عاشق بلش بالعشق بتلا سنينه

أهديها للأخ والصديق الغالي :
الشاعر: نايف الناهي

سلام مني بداء يانايف الناهي = يالصاحب اللي يمر الوقت ماشفته
مرت ثلاث اسنين وين أنت يالاهي = ما تقول لي صاحب ٍ يسأل وهملته

الوقت غربه والليالي مداوير=والطيب اللي صان فيها صلاته
كم واحدن طالت عليه المشاوير=وأصبح على ماقيل ينعي حياته
عزي لحاله من حياة المخاسير=لا صار ما يكسب جميلن بذاته
وكم واحدن صكت عليه المعاسير=وأرخاء على ستر الكرامه عباته
من خوف كلمة جاهلن عقله صغير=يلقى بها بعض البشر له شماته
وأنا عرفت الناس ورد ومصادير=والطيب اللي فاز لحظة مماته
ويالله أنا رجواي بيض المقادير=يالواحد المعبود مأعبد سواته

أنا الهزيل الجزل وأنا الضعيف القوي=وأنا النفوس الحزينة عقب أمواتها
أنا الحظوظ الردية في حياة بدوي=حتى الفرح مر من قدامه وفاتها

الشعر مهما قل مافاتني فوت=يبقى بدمي والخفوق ووريده
أجر لعبونه إلياصرت مكبوت=وأجر من كل الطروق العديده

لاصرت ضايق وأكتم الدمع بالعين=ألجا لشعري وأشكي الهم وآبوح
أمشي ومدري وجهتي يالخوي وين=كل الزمان آلام وهموم وجروح

نحت إسمك فوق صخر الكتابة=وغرفت لك من غبة الشعر بيتين
وحاولت أعبر عن سؤال وإجابة=في داخلي حررتها للميادين

مريت من ذاك المكان وعلى البال=مرت طواري صاحبي وأحزنتني
والله لو بالعقل تفويت وهبال=كرهت نفسي والهموم ذبحتني

ياللي مطير هيه رايح على وين=ترا الأذية ردها بالأذية
..............................=.............................

الله أوصاني ببر الأم قدر وإحترام=والخلق معها أديب وله صياغات وفنون
قلت أبكتب به قصيدن ياصل لحد الغمام=بس من وين أبتدي بالشعر للأم الحنون

ياوطن حنا رجال بالسلام وبالحروب=ياوطّنا مانعرف الذل ودروب الردى
لا أحاطوك العدى من شرق ولا من جنوب=من يوقف غيرنا مقدم مغيرين العدى

قمرى وضيقة بال وأوباش تذكار=وليل السهر غطى علي بسكونه
سهران ضايق من تصاريف الأقدار=فكري خصب والشعر يهطل مزونه

أجرم صدوف الزمن وأردى فعوله=طعنة بالظهر من يمنى صديق
وأصعب اللحظات لإذلال الرجولة=لارجيت الميّت اللي مايفيق

هو مسار الحرف في أرض الورق=هو نزف شعري ومشفي علتيّ
حرفي التعبان بالحبر يغرق=والقلم يرجي مناظر طلتي

وين إنت غايب وهالغيبات ما أطولها=معقول تنسى قريبينك وأحبابك
حبيبي الروح تكفى لاتهملّها=كثرت مقابيل من حبك على بابك

ياقمر ياللي بدنياي متعلي=وش سواتك لاخفت ضو النجوم
ياقمر ياسلوتك تنظر لخلي=ولا أنا أنظر لحزني والهموم

الحزن قبر وذكر الأحباب تابوت=والعمر رحلة والتجارب مفيدة
.....................................=.....................................

لايازمن ماهو كذا تنتل الروح=وش حيلتي لاصد عني وأنا أغليه
...................................=.........................................

يابن نعام الشعر ماعاد به حيل=تخاطفوه المبزرة والوغادين
يابن نعام ابن العصاة الحلاحيل=الشعر وين ونبض ساحتانا وين ؟؟

ياخالد إسمع مايلي من صاحبن شاف العجب=شف للبشر ياصاحبي خذها بقد عقولها
أحدن يموت ولافتح بابه ولا شيّد مشب=وأحدن طباع المرجلة في مجلسه مدلولها
ولاصار بيدك مال أمرك قبل ماتنطق وجب=الناس تفتك المشاكل لو تشوف حلولها
ولاصرت عاشق وبخفوقك نار وضلوعك تشب=لاتشتكي ماجاك والعالم تدق طبولها
إفرح وإضحك لو بقلبك ضيقة الدنيا تدب=الناس ماهي حولك وما إنت بهمومك حولها
شكواك للوالي إليا دمعك تولاه المهب=المرجلة ياخوك ماكل الرجال تنولها
ياخالد إضنتني حياتي وإنحجب ضوي حجب=ماجددت دنياي عقب العز سود سمولها
ياخالد أكذب لو أقول إني أعيش ولا أحب=إي والله أحب الثقال اللي تهاب حمولها
إي والله دموعي من أشواقي تعدن الركب=إي والله أحب الهنوف اللي تميل بزولها
إي والله أهوى يالسنافي بس أظاهر بالكذب=إي والله أحب الحياة ولا أحب شمولها
إي والله أطنا يالسنافي بس أطنا من سبب=إي والله حروفي أنا ياصاحبي مسؤولها
ياخالد أدن لصاحبك منفاخ نارك والحطب=أبشعمه وأستنشق الدخان وأبكي حولها
شفت الهوايل والعجب والجرح ببعاده عطب=أبعد ودنياي الشقية بينت لي هولها
ياخالد إسمع مايلي من صاحبن شاف العجب=شف للبشر ياصاحبي خذها بقد عقولها

-:من أنت ؟ )

انا الذي عايش بنفسٍ عزيزه=لو عاندتني بعض الاحيان دنياي
ارخصت للناموس درهم و بيزه=و احفيت في درب المعالي مطاياي

- : ماذا يعني الشعر بحياتك اليوميه ؟

الشعر متنفسي لاضاقت اخلاقي=اسج بصياغة ابياته و طاروقه
اعيش معه الخيال بواقع اوراقي=و اطرب به اللي يجي ذوقي على ذوقه

-: متى تكتب القصيده ؟

لادكت روابع خافقي قمت اصوغ القاف=اعوم البحر لا شك ما ارضا سوى الصافي
اما ليا عديت في عالي المشراف=و الا اذا جفني مع النوم متجافي

- : مطلع أول قصيده نظمتها ؟

الله من جفن قزا عن رقاده=و العين صبّت صافي الدمع صبّا
طار الكرى و القلب غلّق جلاده=و من الروابع كل عرقٍ تعبّا

- : مطلع قصيده قريبة من قلبك ؟

هبوب الشمال اللي تهبين كل عصير=اهنيك يوم انك تمرين بالديره
امانه اذا جيتي تجيبين لي عبير=هذيك الديار اللي ملا القلب تقديرة
احب الجبل محبة كليب عند الزير=محبة وطن ماهي لنوره و لا منيره

مطلع من قصيده احتفظت بها (سراً)

ياخيـالـي شــد حيـلـك و حـلّـق بــي سـمــا=عـادتـي لامـــن تـنـويـت مـاانـاظـر وراي
يـاجـعـل عـيــنٍ تـنـاظــر تـحـتـهـا لـلـعـمـا=دامـت نـجـوم الثـريـاء تــلألأ فــي سـمـاي

- : اكتب لنا ببيتين شعر .. عن ماذا يعني لك الآتي :


* الأم

يأعـظـم الـحـب يـاهـذا الكـيـان العظـيـم=يامـصـدر العاطـفـة بقلـوبـنـا و الـحـنـان
الله جعـل لـي تحـت ماطـاك جنـة نعـيـم=بالدين وانا ادري اني في حقوقك مدان

* الوطن

الوطن عرض المواطن و ارضه=و المواطن ثروة لبلاده
عايشينٍ فيه طوله عرضه=و الولأ للدين هو و القاده

* سهر

كن السهر لاتذكرتك صديق حميم=يسمر خيالك مع افكاري و انا اسمر معه
ماللسهر في عيوني غير حق المقيم=لاحل بعد الرحيل و نزّل الامتعه

* الصديق

صديقي اللي على الزلّه يعاتبني=اللي ليا اخطيت قال احذر من الزلّه
ما هو صديق يهد لياقعدت ابني=الناب يضحك و قلبه صايبه علّه

* القلم

ان ما جعلك العلم نارٍ على راس العلم=معناته انه ما نفعك و لا نفعت المجتمع
يوم الله انزل محكم القرأن و اقسم بالقلم=من شان ندرك واجبه ياعاقل انظر و استمع

* الحبيبــه

حبيبتي و العمر رحله و الحياة بلا وصال=مثل السراب اللي تشوف و كل ما تقرب يزول
ياراس مالي كان للعشاق ربح وراس مال=انتي غناتي ياغناتي بس بعدك لا يطول

* القمر

كن القمر لاهزم جيش الظلام البهيم=الفارس اللي يزف النصر و اشجعه
و كنه اذا طل في صدري يهب النسيم=و كنه يناجي هواجيسي و هي تسمعه

- : مطلع من قصيده ندمت على كتابتها ؟

الشعر لاخيّل براسي له خيال و احتدم=امطرت به صحراء الحياة اللي كواني همها
و ابعد عن اسباب الخطا من شان مأشعر بالندم=و مالي و مال اهل النمايم مدحها من ذمها

- : مطلع من قصيده تحت الانشاء ؟

دنيا مواني و قتل أمال و أماني=كم طعنة من كفوف الوقت توجعني
وقتي حقيقه من الوجهين وراني=بين النقيضين فرّحني و روّعني

- : أختر عضوء من (من شعراء حائل نت) وأهدي له بيتين من شعرك ؟

سلام للي يتعب البغداد و يدن النجر=و مشرّعٍ بابه لضيفانه و يكرم و يعزم
ابو طراد اللي طلع صيته مثل نور الفجر=اللي عصب راسه على فعل المراجل و احتزم
اغليك يالطيّب لو انك من ورى وادي هجر=و افخر بطيب المعرفه لو ما انت ابن عمي لزم
و اغليك يالسيف الحدب و اكرهك ياعوج العجر=و ارفع نظر عيني سما مالد عيني بالحزم
و لااسمع كلام اهل النميمه و لاأماشي غجر=لان القزم مهما رفع راسه يبي يبقى قزم

- : نختم هذا اللقاء باتحافنا بقصيده من نظمك تهديها (لقسم الشعروالقوافي)

الصد يحرق خفـوق عذبـه صمتـك=اقول ممكن نوى يرحـل و يهجرنـي
رغم ان قلبي تطمـن يـوم كلمتـك=الا ان شكي بـدا بعـدك يساورنـي
وكان الخطاء يوم بالاسرار علمتـك=الله يبيحك و انا بالصـدق يأجرنـي
تبي الحقيقه انا اللـي فيـك وهّمتـك=اخلصت لك بس ماضنّـك معبّرنـي
يوم استلمتك ضعيف و ثـم سلمتـك=اقوى هل الغدر لامن جيت تغدرنـي
لقيتـك انسـان طايـح ثـم قوّمتـك=مابيك من طعنـة الايـام تنصرنـي
و لا ابي لياضاقـت الدنيـا تيممتـك=ابيك بالخيـر و الاحسـان تذكرنـي
و ان بعتني بأرخص الاثمان ما سمتك=من باعني بعت كرته و انت خابرني

ارجو ان اكون قد وفقت في تدوين اوراقي التي اتمنى ان ترتقي الى مستوى هذه الصفحة المشرقه

و يشرفني ان ارشح استاذي الفاضل و شاعرنا القدير :