من عشقته وانا لي موعد مع هناي
كافي اللي سواد الامس مني نهب

صرت احس بوجودي بعد رحلة شقاي
بعد ماكنت احس اني سراب وكذب

احسب انه طويل قبل اعرفه ظماي
واحسب انه خفوقي قبل حبه صعب

أثرني مت عشق وبان فيني رداي
أحسب اني قويه بس صبري هرب

آه لو تسمعينه يوم يوصف حلاي
صحرا الاحساس فيني تزدهي بالعشب

قال مابه حبيبه في حياته سواي
وقال اني حقيقة كل ماهو كتب

وفي ظلام الليالي لو غمرني بكاي
التجي له نخفف بعض بعض التعب

وانشغل في عيونه عن سبايب عناي
واعشق الهم لو همي لقربه سبب

ساعة أبوح له ما صابني في أساي
شفت قلبه حنون وشفت صدره رحب

ولو همس لي ( أحبك ) صرت أسكن سماي
وأشعر أن الثرى من تحت رجلي ذهب

وصرت أغيظ العذارى في كلامه معاي
واذكر أنه بنى لي قصر فوق السحاب

نبه الفجر عن صبح تلحف دجاي
رقص بداخلي طير نساه الطرب

علًم النسمه تغيظ الورود بشذاي
علم الطل يجري بين خوخ وعنب

في فراقه وقدري ما تجاوز ثراي
وفي وصاله أميره تنحني لي شهب

ليت يرضي شعوره عن بلادة عطاي
ليت يرضى مكانه بين رمش وهدب

لو تفجرت حب ،، ولو وهبته غلاي
أعذريني .. أنا يا بنت بنتٍ تحب...