لاصار طيب الناس هالوقـت غايـب
والشاطر اللي قرصته قرصة الـداب
ولاصار قلبي فـي هقاويـه خايـب
هاجر حبيبه دون توديـع واسبـاب
ولاصرت بالدنيا اشـوف العجايـب
مايعيش فيها غيـر خايـن وكـذاب
ولاصرت أنا أبكي والجوارح عطايب
واللي علي يبكي ..إذا غبت يغتـاب
ولاصرت أنا والهـم مثـل القرايـب
والوقت يجبرني على غيـر ماطـاب
لاتسألونـي ليـه دمعـي سكـايـب
غصبٍ علي دمعي على الخد سكّـاب
ابكي من جـروح سببهـا الحبايـب
ماابكي من جروح تجيني من أغراب
يانفس أنا من دنيتي صـرت طايـب
والروح لاطابت تبـي تقفـل البـاب
والروح ماتقفل مـن اتفـه سبايـب
الروح تقفل.. من سبب جرح الأحباب
واليوم أنا راسي من الحمل شايـب
والمشكله بالعمر أنـا تونـي شـاب
لكن أنـا يانفـس رغـم المصايـب
أضحك وأجامل وأفتح القلب ترحـاب
ورغم الأذى أنسى والبـي طلايـب
وضاع العمر مابين طالـب وطـلاب
مهما انجرح..قلبي وسيع الرحايـب
ارجع واسامحهم من شويـة عتـاب
ومااندم على طيبي ولو كان عايـب
الطيب طبع القلـب والطبـع غـلاب
الطيب صار بهالزمن لـه ضرايـب
بدفعها وأفتح (بوك قلبي )بلا حساب
هذا نصيبـي والعمـر لـه نوايـب
دنيا كتبها الله علـى البعـد بكتـاب
الواحـد الرحمـن جـزل الوهايـب
هو عالم باللي خفى وسـط الألبـاب
وارجيه رحمه في زمـان العجايـب
ويرحم صويبٍ من عنا الوقت منصاب
هذا جوابـي لـو سؤالـك هبايـب
هبت على عيني وبدى الدمع ينساب
الشاعر : هاني التويجري...
الشاطر الي قرصته قرصة الداب 
العرض العادي
