غرب الزوين بمعشبات المسايل =سجّيت سجّة واله القلب مشغول
جارٍ عليه من الليالي دِبايل=ياقشرها دنياً على العرض والطول
تركت ربعي بالطّـلاح الظلايل=وطاوعت رجليـّه على غير مدلول
ياخذ بي الهاجس جنوب وشمايل=وابحث خفا قلبٍ من الهم ماهول
ولا فادني من نابي الارض طايل=رجمٍ من النِشَّاد والطير مدهول
عديت به والقصد تبرى الغلايل=من ضامرٍ كنـّه على الجمْر مملول
لو شفتني مرتز فوقه واخايل=برقٍ من الذكرى مع الجو مشعول
في مزنةٍ صـبَّت بردها جلايل=على حزومٍ بالحشا كلّها امحول
يعرض لي الماضي سواة الرحايل=من عهدي الميمون جولٍ ورا جول
مدري انا اذكر ونسة ايام حايل= ولاّ الليالي يم كحله ومكحول
ولاّ اتعلّى للرجوم الطوايل=غربي عويرض يوم الايام بقبول
وناسةٍ لمدوّرين الهوايل =من دونها لو آصفه يقصر القول
طلعة شبب ماهيب كشتة عوايل=مكيالها عِـدّه ورا الالف مكيول
راحت كما فيٍّ مع الشمس زايل=والدمع من عيني على الخد مهمول
عَلَيّْ منها كالثياب السمايل=الناس تنقدني وانا الوضع مقبول
ومن كان مثلي مايطيع العذايل=وشلون ولي طبعٍ على الصيد مجبول
طبعٍ ورثـته من كريم الخصايل=ابو خلف جِعْـله عن النار معزول
ياما معه عدّيت روس القذايل=الى انصرم هزّاع طيره على الجول
وانا صغيرٍ ماعرفت المسايل=افرح بشوفة جافل الصيد مقتول
ننام في قفرٍ به الذيب جايل=اثـنـيـنـنا ماغيرنا بالخلا زول
الليل في عيني هكا الوقت هايل=والنجم يرسل لي من الود مرسول
والى صحينا يضحكن الخمايل=للورد لامنـّه بدا الصبح مطلول
واليوم يوم اني عرفت الحصايل=مازال تذكاره بالاضلاع مخيول
وعوّدت اترجم مبهمات الرسايل=واقرا تعابير الكتابه على اصول
وامشي دروبٍ ماوطتها القبايل=ولا رعت جيّانها هـمّـل الشُّول
قفرٍ عفت من مرمسات الدلايل=أدلّـها دل القطا كل مجهول
سكّانها ماغير ربدٍ جفايل=وسحمٍ يدوجن في دجى الليل ووعول
معشوقتي عن ضافرات الجدايل=لازم اجيها بالخراميس وآجول
مع رفقةٍ من كاسبين النفايل=ناسٍ تصدِّق جملة القول بفعول
ايام نقضيها ولو هي قلايل=تفتح لنا بابٍ من الهم مقفول
ياعل يسقيها حقوق المخايل=لما يزهّر بالحيا كل هذلول
من شان لاجيناه تبرى الغلايل=من ضامرٍ كـنّـه على الجمر مملول