أشره وعاتبني عتاب المواليف ... ماشوف للتجريح يازين داعي

من قبل تجرحك بهواي المحاسيف ... اسمع وقدر ياحبيبي دفاعي

يمكن تقول المخطيات الصواديف ... للجرح مثلك لايزيد اندفاعي

جرح الغلا في خاطري منك ماشيف ... ماشفت لوعة خافقي والتياعي

كلي على صادق هوانا مخاويف ... لاينتهي ما بيننا للضياعي

اكتم معاناتي واجي لك على الكيف ... واخاف من صدك يزيد اتساعي

ياما التقينا بالموده ملاهيف ... عمر العتب ماصار حكم انقطاعي