من لعينٍ نجـوم الليـل تكلاهـا = ساهره يوم كـلٍ حولهـا غافـي
من همومٍ على الخـلاق مشكاهـا = ومن نشد قلت أنا طيب ومتعافـي
راس مالي رضى نفسي وتقواهـا = وإن طلبت اطلب الله ستره الضافي
عالم بروح عبـدٍ بـث شكواهـا = في دجى الليله اللي نورها طافـي
مخفيٍ حاجته في الصدر ماابداهـا = غير للواحد اللي عالـم الخافـي
يالله اطلبك تحيي الـروح بمناهـا = مثل ماتحيي ارضٍ عقب الإتلافـي
جالها القيض والسافـي تقفّاهـا = ولابقي شي عقب القيض والسافي
ثم سقت المزون اللي إنتثر ماهـا = من عطاك الجزيل ومدّك الوافـي
علها الغيث بعد الموت واحياهـا = في بداية ربيـع وجوّهـا صافـي
وإكتست بالحيا يوم الله أعطاهـا = وإختلط نبتها من كـل الأصنافـي
وإشتبك فـوق تربتهـا وغطاهـا = من بديع الزهور وزين الأوصافي
راحت أنعم من الديبـاج لوجاهـا = ترف الاقدام يمشي والقدم حافـي
لين الاقدام تبـرد عنـد ماطاهـا = يوم يبتلّ منهـا بطـن الاخفافـي
ذكريـاتٍ جميـلـه مانسينـاهـا = منية الشاعر اللي يبـدع القافـي
يوم الأيام صفيت لـه وصافاهـا = قبل جفوة زمانه والزمـن جافـي
الله أكبر علـى الدنيـا وجفواهـا = كيف تبدي الجفا من كل ميلافـي
يوم تطري عليّ سنيـن عشناهـا = كنها حلـم ليـل ومرقـدٍ دافـي
مرت علـوم لـو إنـا حكيناهـا = عند مرتـاح لاجـرّب ولاشافـي
مايصدق صحيـح إنـا لحقناهـا = كنها من قصص ماضين الأسلافي
وجاتنا اليـوم دنيـاً ماعرفناهـا = ترخي اللي رفيع وترفـع الهافـي
وللقيامـه علامـاتٍ وجدنـاهـا = أصبحت واضحه بالعين تنشافـي
في طوال البيوت اللـي بنيناهـا = عقب كنا بدون فـراش ولحافـي
مكثـر بيوتنـا لكـن قفلنـاهـا = مابها حلّـةٍ يلفـي لهـا اللافـي
ضِيفة الطرقـي الجايـع فقدناهـا = والمواجيب راحت دين واسلافـي
وبهرتنـا الحضـاره وإقتحمناهـا = والغشيم إمتطاها خلـف وخلافـي
والحضـاره ندوّرهـا ونبغـاهـا = مير أخذها بعضنا جهل وإسرافـي
كلمـا جـات بدعايـه قبلنـاهـا = كيف نجهل وفينا نـاس عرافـي
جاتنـا بالحداثـه وإستلمنـاهـا = ووصلت العولمه حتـى للاريافـي
خابـت العولمـه واللـي تبناهـا = دعوةٍ ماوراهـا حـق وإنصافـي
والله مانـي مصدقهـا بدعواهـا = لو تقـدم لهـا تسعيـن حلافـي
راس مالي رضى نفسي وتقواهـا = وإن طلبت أطلب الله ستره الضافي
الـــــروح ومــنــاهــا للشاعر عبدالله الطلحي 
العرض العادي
