لله در الشعر لله دره
أفز ليا جتني جزال القصاايد
ثم أفهق أشماغي وأفك الازره
لازم ألبسها الحلي والقلااايد
وأغوص غب البحر واجيب دره
ويجيك عقد(ن) من ثمين الفرااايد
ياذيب للأيام كره وفره
واللي يضرك مايجيب الفواايد
ياكثر نفس الآدمي ماتغره
كلن يحس إنه على الناس زاايد
واللي إذا قفيت هرجه يثره
خله يموت بوسط قلبه وقااايد
ماهوب كفو إني عليه أتشره
راع الفوايد دايم الدوم صاايد
ماهيب الاولى قبلها كم مره
لا شك ماحرك وسيع البناايد
وإذا حصل بين القريبين عره
أبعد عن الأحداث خلك محااايد
تضيع بين الكوكبه والمجره
ولا عاد تدري وين علم الوكاايد
وترى الفراق اللي على حين غره
يبطي له بقلب البنادم ثنااايد
له بالحشا جرحن وبالوجه جره
وإن نام مايهنى بحلو الوسااايد
يوم إن بعض الناس بعده مسره
ويلااه يافرقى وساع البنااايد
فارقت من كانت ضلوعي مقره
غلا في قلبي سواله بدااايد
هاذي صدوف الوقت كره وفره
والله يرحمنا بيوم الشدايد
الشعر : سيف بن مطلق الراشد
يا ذيب 
العرض العادي
