هب الشمال وهب شرقي مهبك = ومشاعر الشاعر تراجف بمذراك
وقوافي مثل الجمر تلتحف بك = والشعر يبرد في غرامك ويدفاك
أقلط تفضل وسط جوفي مشبك = زل العروق دلال والقلب مركاك
برفة خفوقي نوّخ وحط ركبك = زهى المكان وطاب يازين ملفاك
أقرأ العيون حروف لا طالعت بك = اسمع سكوت هاج صمته وناداك
وكفوف ترجف ترتعش عند قربك = تكبر مسافة وصلها دون يمناك
وشعرٍسهر طربان ليله سجع بك = من حزة حضورك إلى وقت مسراك
والليل ونجومه ومايحب قلبك = وقمرا سلاسل نورها فز لرضاك
وقاعِ ضما يعشق غيومك وسحبك=يرشف غرامه ديم من غيمة شفاك
وخيول تاهت بالهواء واعتزت بك =جاتك تسابق فيك منّا ومنّآك
والفارس الأبيض وقع عند ضربك = حقق صوابه ماجرى هوش وعراك
هشّم شموخه وأنكسر فوق صلبك = عينٍ على جرحه وعينٍ على دواك
لَف البسيطه وانتهى عند قطبك = دار الكواكب والمجره والأفلاك
جنب قشور الخلق وامتص لبك = منك اعتصر نكهات حبه وسوّاك
طهر غرامه من شخاليل عذبك = وجاب الطهاره من معانيك مسواك
لآن الخفوق اللي بشوقه سكن بك = وهامت تفاكيره بطيبك وحسناك
والهاجس اللي طول ليله رحل بك = يسهر على فكر المولع ويرعاك
هام ابحور الشعر يومه كتب بك = يلعب على مسحوب شعره وغناك
لامس دفأ قافك ضميره وحس بك = وردت له الذكرى قصيدك ومعناك
مشى دروبك ماتدرأ مطبك = لو إن حثاث القاع مزروع بأشواك
طاف البصر في كل ريع وحضر بك = وبين النجوم العاليه فوق شفناك
وعطر المداد اللي طغى وانتثر بك = لا فاحت سطور القوافي عرفناك
لو تاه اسمك والرموز انتحت بك = ملامحك تظهر مع الفين شباك
لو اختصرت الوقت للي يحبك = وجيته على وضح النقاء داك. ورداك
مابين شرهة خاطري والعشم بك = ذنب الحلوف أللي إقترفته بدنياك
أدري وأداري دون جدك ولعبك = وأعرف ترى أصلك وفصلك ومجناك
رسمك هو رسمك والأسامي زهت بك = ترَف القوافي دوم مثلك وشرواك
نقطع محيطات الهوى ونغّمق بك = ونغوص باعماق الليالي ونلقاك
والشاعر أللي بِحس قافك هذربك = جابك على تاج القوافي وعلاك
شافك عروس الشعر .. كلً يخطبك = هذا طلب ودك وهذا بيهواك
وياكثر منه في خياله سرح بك = ترعى بنات الفكر في روض مفلاك
ياالمهرة اللي كل فارس طمع بك = كل رمى حباله يمينك ويسراك
واللي جذب عنان جيدك وذبك = هاجت به النخوة لصوتك ومدعاك
شالك على متون المحبه .. هربك = بشراك .. اطلب ماتمنيت بشراك
لقى مكانه بين ربعك وصحبك =رف الضمير الحي لأجلك وخاواك
اكتب وسجل من تحايا محبك = كتب لك أغلى القصايد وجاراك