عز الله اضحك يانديبي بحزات=اضحك وانا حزات ضحكي قليله
هيهات عني ساعة الضحك هيهات=مادام وسط القلب مثل المليله
ماسببه كثر الولع بالبنيات=قصيرةٍ هذي وهذي طويله
ولاسببه جور الزمن والملمات=اللي قلوب الناس منهن عليله
ولاسببه سوق الدراهم وليرات=في سوق الاسهم باع حتى الحليله
ولاسببه من هرب البيض والقات=الفقر سوا به سوات البليله
ولاسببه من قابل النت والشات=لعبٍ ونصب وذم في كل ليله
ولاسببه من يطردون الموديلات=وزكاة ماله مادعى من يشيله
ولاسببه فعل اليهودي وصيحات=العين تبصر والمدامع هميله
ولاسببه عمل المخالف بسيهات=شقى حياته في مماته حصيله
ولاسببه قل المطر والمعانات=الله كريم وحالنا نشتكيله
أسباب مابي من عيوب الصداقات=وحال الخليل اللي نشد عن خليله
صداقةٍ تبنى على زيف وآهات=لوربعت ترجع صفاتٍ محيله
ناسٍ صداقتهم على شوف عورات=وناسٍ صداقتهم تهرّب وأشيله
وناسٍ صداقتهم مشاكل ونكبات=وناسٍ تجمع خبلها والهبيله
وناسٍ صداقتهم مصالح وسومات=به مصلحه والا يدوّر بديله
وناسٍ صداقتهم على ذكر وآيات=أهل القلوب الصالحه والجميله
وناسٍ صدقتهم قوافل وطلعات=عينٍ فراش وعين الآخر ظليله
وناسٍ صداقتهم بفزعه وشيمات=يمد يفزع مايصرّ بشليله
في وقتنا هذا مواقف وعبرات=والعاقل الفاهم يدور وسيله