ودي والله اشارك بالسباق الكبير = فوق شاص جديد فارق بالكمال
كمّل الفين تسمع بالخفايا صفير = مثل طير تعنا الخرب بارضٍ سهال
مير أخاف اني (أقلب) والعرب تستخير = وان بغيت الصراحة ماهو لي المجال
شاعر طول ليله بالعرب يستدير = لو سألته سؤال مادرى بالسؤال
عاشق والحبيبة دونه أمرٍ عسير = شايل في خفوقه نار مثل الجبال
قلبه اللي توقد والعظم زمهرير = لاحكوا بالحبيبة زام وزت العقال
أنزل الشمس نار لاجل عين الغرير = والمعاميل غيم (بنّها) من شمال
صب هذي في هذي هيلها كالعبير = بهّر الشوق لين القلب ولّع..وقال:
وين حايل تروني بين برد وسعير = وين حايل وحايل منبت للرجال
وين حايل وحايل ضلعها مستنير = وين حايل وحايل عزها لايزال
زارها واحدٍ يوم العرب قمطرير = باول العمر هارب من عذاب القتال
من صلاة الفجر حتى صلاة الأخير = قال هذي تروها ديرتي ياخوال
ولاطلع لين قبره صار عند الغدير = من غرامه بحايل مارضى بالبدال
من يلومه كفيف العقل عقله صغير = ماتنفس هواها ولا شرب من زلال
والجزاء للي سبب للسباق الكبير = واللي يركض ويعمل ما يهمه محال
يالنشامى جزاكم عند رب قدير = يحفظ الله حايل والجبل والسهال
"ودي والله أشارك بالسباق الكبير".........! 
العرض العادي
