بسم الله الرحمن الرحيم
أقيمت أمسية شعراء حائل نت بمخيم أمير وأهالي حائل برعاية قناة الساحة ضمن الفعاليات المصاحبة لرالي حائل 2008
وأنقسمت الى أمسيتين الأولى كان العريف الاستاذ فيصل الرمالي وكان فرسان الأمسية احمد الجريفاني ونايف السمحان وزياد الضويلي ومحمد السريع
بدأ عريف الأمسية بالترحيب حيث قال :
الحمد لله على إحسانه والشكر على توفيقه وامتنانه والصلاة والسلام على خير أنبيائه أما بعد :
حضورنا الكريم , السلام عليكم ورحمة الله وبركاته .
سعدتم وأمسيتم مساءً طيباً في ليلةٍ من ليالي الشعر البهيج تتغنى بكم زهرها الأريج عازفةً أجمل لحونه وطربه إيقاعاً بوجودكم أنتم حضورنا الكريم .
في ليلة تكتب على صفحات القصيد كقصيدة وزنها حضوركم وقافيتها عشقكم لهذا التراث الجميل والأصيل .
يطيب لنا أن نلتقي بكم مجددا أيها الإخوة الحضور في هذه الأمسية التي تقام ضمن الفعاليات المصاحبة لرالي حائل 2008 تنظم هذه الأمسية شبكة ومنتديات حائل نت وبرعاية قناة الساحة الفضائية .
شبكة ومنتديات حائل نت شبكة تهتم بمنطقة حائل وأخبارها تأسست الشبكة في شهر شوال من عام 1427 هـ
يرأس مجلس إدارتها الأستاذ / عارف السلمان
اهتمت الشبكة بكل مايتعلق بمنطقة حائل وموروثها ومن ضمنها شعراء حائل
حائل التي زهت ومنذ العصور بتاريخها الحافل وبجمال طبيعتها وأصالة انتمائها .
حائل التاريخ وحائل المجد وحائل الحضارة يقول الشاعر ناصر القحطاني :
الشمس غابت وكل ٍ دوّر سراجه = والشوق جمّر محرّ الشوق لاجمّر
دام اتجاهك شمال مودعك حاجه = سلّم على حايل وسلّم على شمّر
قدامك الخافق اللي ينشد علاجه = كنه معلّق على برزان ومسمّر
وأنت تعرف يا بعد حيي من تواجه = بيضان الأفعال لامن الزمن سمّر
إن ضاقوا أعنف من البحر ومن أمواجه = وان راقو أركد من الخرمان لا عمّر
وكم حاتمي ٍ تكفيّ فلت احجاجه = وش لون للضيف لو عن ساعده شمّر ؟
وان مر تاريخهم متلبس ٍ تاجه = كم عاشق ٍ كيّف وكم حاسد ٍ زمّر
في جو ٍ أغلى على الرجلي الى داجه = من ديرة السادس ومن ديرة معمّر
فحائل تزخر بالكثير من الشعراء وهدفت منتديات حائل نت لاحتوائهم والاهتمام بهم فقد تم تسجيل العديد من الشعراء الذين أنظموا للمنتديات ولرد شئ مما قدموه هؤلاء الشعراء فقد أقامت الأمسية هذه الليلة وبرعاية قناة الساحة الفضائية الذي نشكر القائمين عليها على الاهتمام بالموروث والمتابعة الدقيقة للفعاليات
في مساء اليوم الأربعاء الموافق السادس من شهر صفر لعام ألف وأربعمائة وتسعة وعشرون للهجرة .
أضاءت قناديل الشعر شعلتها في هذه الأمسية سعدنا كثيراً بتواجد شعراء من نخبة شعراء المنطقة ومن شعراء حائل نت يشاركوننا بروائع الشعر وأصدق الأحاسيس .
شاعرنا الأول لهذا المساء : هو أحد أعضاء منتدى حائل نت رحبوا معنا بالشاعر احمد الجريفاني
رحب الجمهور بالشاعر احمد الذي بدأ أول قصائده بالملك وكانت
امطـرت حـايـل بمـقـدم امــام المسلمـيـن = يـوم ابـو متعـب نـوى درعمـت شعبانهـا
ماهو وقتن للمطر امطرت من شان عيـن = لا حضـر صقـر العروبـه جـرت وديانـهـا
مبطيـن عنهـا وهــزه لشوفـتـك الحنـيـن = دوك الارض تـفــز لاشـاهــدت خـلانـهـا
المحبـه خصلتـن فيـك يـا القـرم الفطـيـن = المحبـه مـا تبـي غيـر شخـصـن صانـهـا
وانت مالك با الغلـى يـا بعـد حيـي وزيـن = يمـدحـك فعـلـك وعطـفـك عـلـى سكانـهـا
الغلـى مـا جـاك صدفـه بنيتـه مـن سنيـن = قبـل مـا تصبـح ولـي عهـد كنـت لسانهـا
اسـال اهـل المملكـه عـن محبتـك ويبـيـن = الـصـغــار يـقـدرونــك قــبــل شيـبـانـهـا
القيـاده مهرتـن وانـت فارسهـا الـرزيـن = مـا عسفهـا غيـر مــن جــوده برسانـهـا
با السما صقر العروبه ومن حولك عرين = عــادة اللـيـث المحـنـك يصـيـد سمـانـهـا
فيك رحمـة والـد وفيـك حـزم وفيـك ليـن = الـصـرامـه والـعـفـو حنـكـتـك مـيـزانـهـا
القصايـد فيـك تختـال حسـن وفـرط زيـن = لـو نـحـاول نختصـرهـا عـصـت قيفانـهـا
الله يبـهـيـك يـــا سـيــدي دنـيــا وديـــن = وجـعـل حـايـل دايــم تـزورهـا فرسـانـهـا
ما يشيب الشعر في مدح مـن حبـه دفيـن = ولا تفوت المرجلـه مـن ربـى باحضانهـا
يا مترجم كل شخصن غدى هرجه رطيـن = مـا حـدن يطمـع بـنـا لا حمـيـت اركانـهـا
الحكـم مـن دون حكمتـك مـا يملـك يـديـن = والعدل من دون من هيبتك ملـك اعيانهـا
شاعرنا الثاني لهذا المساء : هو عضو مجلس إدارة المنتدى و المشرف على قسم الشعر والقوافي بالمنتدى
رحبوا معنا بالشاعر نايف السمحان .
الذي رحب بالحضور وشكر قناة الساحة والجمهور على الحضور الذي قال سأبدأ بقصيدة تعني لي الشئ الكثر وبدأ أول قصائده :
على ذاك الطريق المظلم الموحش يامنصور = نزف جرح واتبعثر شعور وازريت ألمه
على ذاك الطريق اللي عنه يغيب النور = طاحت عزيمة خافقي وطاحت الهمه
على ذاك الطريق المظلم الموحش المهجور = ضاعت كل الأصوات وبقى صوت يايمه
مصيبتنا محبتنا كذب وخداع وجور = مصيبتنا نصدقها حبيبي هذي مطمه
كرامتنا على الصامت مبادئنا غدت ديكور = نبكي حالنا بالحيل بقايا رجال من أمه
صار لعبنا الإحساس ولانعرف معنى شعور = صار شعورنا بالكيف بأي يمه بأي يمه
انا ماأقول هالشعر عشان يصفق الجمهور = أنا أحكي معاناة إنسان صادق تهمه
عوامل تعرية قامت تلمع الشاعر المشهور = يضحك على ضعاف العقول من نطق فمه
قبل أيام عشان الحظ كان شاعر مغمور = وهالأيام عشان الحظ صار بعالي القمه
يامستهلكين الشعر والإحساس وزيف شعور = يامستضعفين الفكر والذوق والورد وشمه
بس الحذر من بركان الشعر لايجي يوم ويثور = الله يستر على انفسنا والله يستر على الأمه
شاعرنا الثالث لهذا المساء : هو المشرف على قسم الشعر والقوافي بالمنتدى رحبوا معنا بالشاعر زياد الضويلي
الذي رحب الحضور وبدأ أول قصائدة حيث قال :
ياعين هاتي دمعك اليوم مــدرار = وهاتي جميع اللي تخفى من دموع
ياعين انا مقهور في داخلي نـار = ضاقت بي الحيله ادور على سنوع
جانا الخبر عبر الجرايد ولاخبار = مطبوع ولا بـالإذاعـات مـسـمـــوع
قالو لنا غزه تعـانـي من حـصـار = ثم جا خبر بعده عن إنشاء مشروع
ياهي مصيبه منظر الذل والـعـار = اللي على وجيه العرب صار مطبوع
وشلون احفاذ الخنازير الاشـرار = داسو كرامتـنـا بـالاكــراه والطـــوع
وشلون؟ ياعالم تـنـامـون بالـدار = وحصار غزه مستمر فوق الاسبوع
ولاهو حصار الا إبـاده للاعـمـار = وتدمير شعـب يناضل لحق مشروع
تخـيلو !! حرارة الجو بالاصفار = وجدار هده قصف والبـاب مـجـدوع
الاب ضاقت به وسيعات الاقـطار = واطفال تصرخ بينهم عود مصروع
والبرد هجماته من يمين ويسار = منظر أسى في داخل الدار موضوع
هذا مجرد غيض من فيض ماصار = لامـاء ولاكهـرب والامداد مـقـطـوع
حتى حدود الجار من دونه جدار = لو انهدم فـتـره وتـلـقــاه مـصـنـوع
ياليت لويقبس سنا الحرب بالنار = يمكن نحرر شعب عـانا من الـروع
وهالحل لشعب العرب حيل جـبـار = أصعب على هالشعب من حبة الكوع
يالـله يالـلي تـعـلم السـر وجـهـار = يافارج الكـربـه عـلى كـل مـفـجـوع
تنجي شعب غزه من حصار الاسوار = وتامنهم بلطفك من الخوف والجوع
شاعرنا الرابع : هو أحد أعضاء منتدى حائل نت رحبوا معنا بالشاعر محمد السريع
الذي رحب الحضور وبدأ أول قصائدة حيث قال :
دارن و جـارن دايـرات المقـاديـر=ونزلت بالدنيـا و انـا شبـه مجبـور
شفت الاصحا خلـف كـل الطوابيـر=في عالم الثرمان تضحك على العـور
ناديت بأعلا الصوت ياناس مايصيـر=لكنهـا صيحـة وحيـدٍ علـى قبـور
قالوا علامك وش تبي خيـر ياطيـر=خلّك معانا واستـرح داخـل السـور
عرفت بـأن الامـر يحتـاج تفكيـر=وبديت اميز بيـن جايـز و محـذور
وشلون اسير بعالـم يرفـض السيـر=العالم اللـي باخـر القطـر مقطـور
ناسا تنافـس بالفضـاء قاعـدة ميـر=حطوا على العالم مجسـات و سبـور
وحنا بقينـا بيـن جسـاس و الزيـر=قضـيـةٍ بعقولـنـا مـاخــذه دور
مافيـه تجديـد ولا فـيـه تطـويـر=افكارنـا دراس و النـهـج مـأثـور
وش عاد لو نمـلا الخزايـن دنانيـر=ماتستقيـم الحـال و افكارنـا بــور
اوضاعنـا تحتـاج وقفـه و تنظيـر=قبـل يقـص ارقابنـا حـد ساطـور
مادام نملـك بأرضنـا فوهـة البيـر=جوّد قرون الثـور ياصاحـب الثـور
طاح القناع و بينـوا بـوش و بليـر=افكارهم مـن منطلـق وعـد بلفـور
اشتر عقول و نصّر الفكـر تنصيـر=ومن يرفض الخطه يحارب على الفور
استهدفونـا بيـن قـتـل و تهجـيـر=كم يتّموا رضّـع و كـم هدّمـوا دور
وحنـا مهمتنـا مشاهـد و تصـويـر=نشاطنا في نقل الاحـداث محصـور
نندد و لا نهدد و نشجـب و لا غيـر=سـوى مناقـض بعضنـا مالنـا دور
من اقصى صلاله لين طنجه و اغادير=متخالفين الراي و الفعـل و الشـور
لكن عسى البـاري يديـر المقاديـر=يعز الضعيف و يصبح الحق منصـور
ثم انتقل المايكروفون للشاعر الجريفاني الذي قال قصيدته الثانية بعنوان يضيع مقدار الذهب عند الألماس وكانت :
حاولت اترجم نبـض قلبـي بقرطـاس=لقيـت قلبـي بـا الضـلـوع محبـوسـي
رجعت قلت لحامـل الطـرس لا بـاس=لــو تنتـظـر حـتـى تـزيـن النـفـوسـي
يبدوا لي ان الوضـع لا زال منحـاس=رغـم ابتسامـي صـار يقـرأ عبـوسـي
تضاربـت سـود التفاكيـر بـا الــراس=وانصب فـي ظلـم العـذارى هجوسـي
من اولـن مـا هزنـي طيـف هوجـاس=ولايـذكـر الغـربـال غـطـى شمـوسـي
مهمـا جذبنـي للمهـا عطـر الانـفـاس=او طرفها اللي با الرموش محروسي
او عينهـا اللـي كنهـا عـيـن قـرنـاس=مـا قـد خضعـت ولا ذكـر لان قوسـي
تظلم وتطلبنـي علـى الخشـم تنبـاس=لو بست قلـب الخشـم مانـي ببوسـي
الحـب لاجـا زيـف بـا الرجـل ينـداس=يصبـح رحيقـه مـثـل دم الضـروسـي
الحـب مـا لـه عنـد الاحبـاب مقيـاس=شعـور الهـي ماهـو فـكـرة مجـوسـي
ما اوافق اللي قال يبنـى علـى سـاس=متعـلـمـه سـاقــط بــكــل الــدروســي
بدايـتـه رقـــة احـاسـيـس واونـــاس=ونهايـتـه بـيـن الضـلـوع معـفـوسـي
كـلـن بـكـى لـيـلاه والـنـاس اجـنـاس=نـاس بنعـيـم ونــاس تــوه تحـوسـي
من يفقد الاحساس ما يهدي احساس=والحـب مـا يـشـرى بكـثـر الفلـوسـي
يضيـع مقـدار الذهـب عنـد الالـمـاس=وتموت صرخات الغلى بـا العروسـي
ثم أنتقل المايكروفون للشاعر نايف السمحان الذي قال قصيدة بعنوان تعلمت الجفاء وكانت :
تعلمت الجفا منك وانا مثلك بعد بأجفاك=تعبت ابحث انا عنك تعبت ابحث ولاألقاك
على فكره ترى مااقدر بعد ذا الزمن بأنساك=حبيبيي ياهي ذكرى وانا باقي على ذكراك
قطعت كل هالمشوار وانت تدري عشان رضاك=لعنبو حي غيرك انت وش غيَرك وش جاك
حبيبي يابعد عمري وانا احلف بالذي سواك=سبحان مغيِر قلوبٍ كانت تموت بك تهواك
كنت اكبر امالي بداية رحلتي وياك=من اول خيوط الحلم اني اعرفك واهواك
رحلة غامضة وياك تعبت ابحث ولاألقاك=تعلمت الجفا منك وكنت مااقدر على جفواك
حسبي الله ياعمري صارت من عاداتي=تعبت انادي اصوِت وينك يابعد ذاتي
ابذكر ساعة الفرحة وابذكر كل صرخاتي=وابقى وحدي اعاني من الامي من اهاتي
ولاقدَرت هالجيه ولاتقدِر معاناتي=علامك قاسيٍ قلبك وانت تفرح لزلاتي
كنت اغلى ماأملك وانك جزء من ذاتي=شف تالي هجرانك تحمَل مايجي وياتي
طموحي اني اشوفك واعرفك كل طموحاتي=الى اخر طيوف الياس تجددها معاناتي
يلعن الله حبٍ تكثر فيه صيحاتي=سبحان مغيِر اسلوبي صارت من عاداتي
ثم انتقل المايكروفون للشاعر زياد الضويلي وكانت قصيدته بعنوان متاهات الطريق :
مـتـاهات الطريق اللي توديني ولاادري ويـن=عجزت اميـز بـدربي وافـْـرق زينـه وشـيـنـه
تـبيـن الشمس للعالم وعـندي رافـضه لاتبـيـن=ظلام الليل متواصل وصـبحي مالفى حـيـنـه
من اسـبابك انـا اسهـر ليلي والبـشر ممـسـيـن=أفكر قلبي وش سوى عـشان انك تخـونـينـه
أهـيـم اسهـر او اتعـنى وانتي للهـنا تـجــنـيــن=تجنيتي على شخص ٍ بحبك يقـضي سنـيـنـه
خلاص اليـوم ماأقـبل خـيانه يومك تـخـونـيــن=انا ماني مـعـك لعـبه عـلى كـيـفـك تـوديـنـه
اببعـد عـن سما حـبـك وادور بـالبـشـر غـالـيــن=وابلقى وسط خـلـق الله وليفٍ واضح ٍ ديـنـه
واذا أبـعــدت مـاهـمـن بـكـيـتي ولا مـاتـبـكــيــن=لأنــي عـايـش بدنـيـا كـثـيـراتٍ مـزايـيـنـه
ولااخْـفي غـرني زينك جـمال ٍجاب يـمـي البـيـن=لـزوم البنـت باخلاقه تـعّـدل في مـوازيـنـه
أنا اذكـر كان فـيه وحده جمالـه فـاق فـوق الـزيـن=يكفي رمشها الناعس إلا غطى جفن عـينه
عــلـيـهـا جــادل ٍ كــنـه ظــلام ٍيـسـتـحـل الـعـيـن=واذا سـلـهم هدبـها يم شخص ٍ الله يعـينـه
تـعـذب لجـلـهـا عـالـم واهـي ماهـمـهـا أي شـــيــن=حتى اللولو والالماس خذى من زينها زينه
ومشاعـرها كـما الامـواج واشـوف امواجـها عاليـن=يفـيـض احساسها الدافي ويتـزايد محـبيـنـه
تقل من كوكبٍ ثـاني وتـقـل مـانـخـلـقـت من الطيـن=تمنت إني آحـبه واحـط ايـدي على يـديـنـه
تـركـتـه فـدوه لعـيـونـك تـركـتـه ان كـان ماتـدريــن=وقعت بحبك الكاذب هـذاك اللي تـقـولـيـنه
عـذاب وهم وزود اشجان ونين وغم وضـيق ٍ شـيـن=حزين وحالتي صعبه ولاادري فرحتي وينه
ألــم ودمـوع تـرثـيـنـي عـلامـك إنـتـي مـاتـحـسـيـن=تسبب غدرك بجرح ٍ غرز فـيني سكاكينـه
رجـاء ً شـوفي جـوالك وروحـي الذاكـره هـالحـيـن=واذا جيتي على إسمي أنا أرجوك تمحـينـه
انـا بـنـــسـى عـلاقـتـنـا وابـي مـــنـك بـعـد تـنـسـيـن=زرعتي كذبك بغدرك لزوم اليوم تجـنيـنـه
تـقـولـيــن اني ماأقـدر عـلى بـعـــدك ولـو يــومــيــن=صحيح ان للدهرأعوان وانتي من معاوينه
وتـقـوليـن الـفـراق اللـي نويتـه مـسـتحــيـل يــبــيــــن=تري قـلبي يبي ديـنه وانتـي سـددي ديـنـه
وانـا اقـــول المـصــيـبـه لــو نـلاقـي بالبـشـر ثـنـتـيـن=مثل طبعك أشوف الكون خيانه في شرايينه
واظـن انـي إذا أمـشي مـن المغـرب إلى البـحــريــــن=فـلا ألـقى مع العـالم جـفـاةٍ مابـهـا اللــيـنـه
أسـيـر بـدربـي الـمـوحــش يـوديـنـي ولا ادري ويــن=وإلى هالحين انا ماقدر أفرق زينه وشيـنـه
ثم انتقل المايكروفون الى الشاعر محمد السريع الذي كانت قصيدته :
البارحه بيـن المحانـي يشتعـل مثـل الحريـق=و احاول اخفي ما ورى حدب المحاني و استره
وقتي يحاول يلوي ذراعـي و انـا حـرٍ طليـق=من المستحيل اخضع لصكات الزمن لو يكسـره
انا فريق و خصمي الايـام تلعـب فـي فريـق=في معترك ساحة حيـاة الادمـي حظـه كـره
و كاس النجاح يلوح لي و الدرب من دونه يضيق=و ان ما وصلته بالفعل فالعمـر مـا فيـه ثمـره
اما كسبت الفوز باللعبـه و واصلـت الطريـق=و الا احفروا لي يا هلي قبـرٍ بوسـط المقبـره
ياعل رجلاً يختفي راسه عقب مـا هـو مويـق=عساه في يـوم القيامـه مـن فريـق الميسـره
وصديقي اللي ذاخرٍ ميقافه امحق مـن صديـق=يوم احتماء الموقف ركز ساقه و لا جبت خبـره
كنت احسب انه في لزومي يعتلي قمـة طويـق=اثره وصل فرع الشعيب و ساعة اقفيـت حـدره
لاشك انا ما ارجع ورى لو ما بقى بالحلق ريـق=واللي توكل و احتسـب للاجـر ربـه ينصـره
ما يُفتح الحصن المنيـع الا بضـرب المنجنيـق=و على الورق حفظ الوقايع و القلـم و المحبـره
و ياصاحبي ياللي تفكـر دلـة المعنـى بريـق=لا و الله الا دلـةٍ مـن راس اخـوك مبـهـره
اما تعـال و راكنـي و انبيـك بالعلـم الوثيـق=و الا تسريهـا مـع السكـه ورى نـاسٍ سـره
تعبـت ادرّس جاهـل الامـه و عيـاء لا يفيـق=بـلاي عُميـان البصيـره و العيـون المبصـره
و ياصاحبي و اكرر الكلمه ترى خبـرك عتيـق=مهما سطع نـور الاضـاءه ينكسـر بالمنظـره
واهل الحساء لاذعذع الشرقي تمشـوا بالشقيـق=بس البلاء لاذعذع الغربـي غـدا الجـو غبـره
ما قد حصل اني تحدّث فـي حديـثٍ مـا يليـق=بس المواقف تفرض ان تبقـى العلـوم مشفـره
قلته و انا بين المحانـي يشتعـل مثـل الحريـق=و احاول اخفي ما ورى حدب المحاني و استره
ثم بطلب من الجمهور للشاعر احمد الجريفاني لقصيدة الرد على الشاعر ناصر القحطاني ولبا الشاعر احمد الطلب وقال قصيدته :
هلا بشهمٍ صدق في رسم منهاجه = هلا بمنهو تمثّل في جبل شمّر
هلا بمن تعجز القيفان لحراجه = ومن حقه إنه على القيفان يتأمّر
وصل سلامك ولا يحتاج ديباجه = عمّرت صرح الغلا ياعلّك تعمّر
نظمت عذرا تهبّل في تغنّاجه = لو حاول احدن يجاري حسنها قصّر
يامير الاشعار يامن يحسده تاجه = اعذر محاكيك بالقيفان لو كرّر
لو يمرض الجود نادوا فيك لعلاجه = تعطى البشاره لمن في جيتك بشّر
لو يظلم الكون نورك يجلب افراجه = ماعاشرك في حياتك حي ويكدّر
يشهد لك ا لليل لامن ضوت ابراجه = ويشهد لك الحبر والاقلام والدفتّر
والطيب يشهد لك انك صرت هداجه = نعم المراجل ونعم الاصل والمخبر
قحطان كنه محيطٍ تلطم امواجه = طوفان عارم ليامن الهوى زمجر
ولامن هدا الموج يهدي غالي انتاجه = الدر واللول والمرجان والعنبر
ما رامهم طامع إلا يرجع ادراجه = الليث ماينقرب خصٍ ليا كشّر
نبراس عزٍ يسرك في توهّاجه = من خلقت الكون حتى ساعة المحشر
يامن نظمت البيوت وقمت بخراجه = عسى حياتك سهود ولايجيك الشّر
منت الذي يحسب بيوته على حاجه = حنّا هلك والجبل في مثلكم يفخر
ولا غابت الشمس محدن دور سراجه = نور القحاطين ساطع في جبل شمّر
ثم أنهى العرف الأمسية حيث قال :
حضورنا الكريم في نهاية هذه الأمسية لايسعنا إلا أن نشكر فرسان أمسية هذه الليلة على حضورهم ومشاركتهم الرائعة
ونشكر قناة الساحة على التغطية
ونشكر القائمين على مخيم أمير وأهالي منطقة حائل
ونشكركم أنتم أيها الحضور على حضوركم .
وختاما دمتم بحفظ الله وإلى اللقاء والسلام عليكم ورحمة الله وبركاته
صور من الحضور
.
تغطية الأمسية الشعرية لشعراء حائل نت والمقامة في مخيم أمير وأهالي حائل برعاية قناة الساحة ضمن الفعاليات المصاحبة لرالي حائل 2008 
العرض العادي
