سألني احدهم ليه ما نشوفك يا أبو ياسر عسى ما شر وين الغيبات ؟؟ فجاءت هذه الأبيات راجيا أن تنال إعجابكم ..
يا صاحبي عن غيبتي لا تسالــي= وإن كنت تسأل خذ جوابي ولا بأس
ما هي غريبه عزلتي وإنعزالــي= والنفْس ما فيها من الْـمَس وسواس
اللي ، مسليني وحيدٍ لحالـــي= (الحاسب الآلـي) ولو غابوا الناس!
(الحاسب الآلي) وسيع المجالــي= نديمي الوافي على العين والـــراس
لو أحتمل وياه فوق إحتمالــي= أو أنحمس وياه في وسط محمــاس
ينسيني، الهـولاس مهما طرالـي= خير الجليس وبالفعل ما له أجنـاس
معاه ، يا ما أنسى العمل والعيالي= في عالم (الحاسـوب) بعيد الإرماس
أسلا ، لحالي بالعقل والهبالــي= في كل لحظات الوناسة والأتعــاس
في وحدتي أسأل وأجاوب سؤالي= مبسوط في كامل شعوري والإحساس
(الوورد) انسخ فيه شعر ومقالي= و(الفوتوشوب) أشوف فيه أجمل النــاس
والمعلومات اللي وجوده محالـي= يأتي بها (قـوقـل) تنَكَّس تنكَّـاس
لا شيءْ مع (الحاسب) بعيد المنالي= على هوى (الكيبورد) في لمس لـمَّــاس
ولو تعطَّـل لحظـةٍ ضاق بالـي= بـ(السوفت وير) أصير حاير ومحتــاس
أبقى ، ما بين (إنتر وشفت) إنشغالـي= و(الماوس) بعد رافق اللمس تنـداس
من حيرتي ، مرات أكلم ظلالـي= ومن التوتر حيلتي طحن الأضـراس
ومرات، أغني في هوى الهمَّلالـي= ويا هوى (الحاسب) على طيْب الأنفــاس
(الهارد وير) مكملٍ بالكمالـي= و(السوفت وير) أساس ثابت على سـاس
من (الفيروسات) وبعض الأغلاط خالي= ما فيه عند الأمر دقات الأجــراس
بالسرعة القصوى سريع الوصالي= ترقص لي الشاشة بزينات الألبـاس
يأتي لي الخاطر على خط عالـي= وأشوفني مبسوط في حفل الأعـراس
في مجلسٍ من حول صفر الدلالي= والمير من حولي صناديق وأكيــاس
والبدر في صافي سمايه يلالــي= قمراه في نصف الشهر كنها ألمـاس
في وحدتي وياه داله وسالــي= ما تنوصف وناستي بين الأونــاس
يفيض مع واسع خياله خيالـي= في همي الساري حروفٍ بكــرَّاس
ترقص برأسي في هواه الليالـي= والنَّزف ، من مشاعري يـمْرس إمــراس
في منتدى (الأسلم) قراحٍ زلالي= يروي تباريحٍ من الجدب يبَّـــاس
وبين (الطنايا) فاتحين المجالــي= لنا من (الديوان) بالصدر مجــلاس
و(مضايف شمر) بالنِّجَد والشمالي= وفي (سبق) درسنا الفراسة لـدراس
و(ساحات حايل) في مديد الحبالي= لنا بها بـادي وحادي وعسَّــاس
و(أجا) و(فضاء حايل) بليا جدالي= فيها نقى صفحاتنا يرفع أقــواس
ومع(القوافل) من قديمٍ وتالـي= لنا الفراسة من على قُبْ الأفـراس
وفينا ومنا بـ(المجالس) سجالـي= بسيف (المهلهل) يا زرَق رمح (جسـاس)
مواقعٍ ، فيها كـريم السبالــي= يأتي ويذهب في معزه ونومـــاس
يسرح ويمرح في زهور المفالــي= على النسيم العذب من كل نسنـاس
بعيد عن شوفة عفون الرجالــي= اللي بفرحة بعدهم نرفع الكــاس
لا صار ما فيهم عزيزٍ وغالــي= ما لـي بشوفة كل حاقد وبــلاس
ما كني ، ألا بين سود الشيالـي= اللي سـوالفهن بعروس ولْبــاس
بالعكس فيهن لين طبع وجمالـي= أخير من شوف القبيحين الأنجــاس
في خاطري لو شفت واحدْ قبالي= ودي على الهامة لو أعطيه بالفـاس
أو إني أفارق خبيث العَمالــي= وأبعد عن أشباح الخساره والإفـلاس
وأبقى مع (الحاسب) كريم الخصالي= ما لي بمجــلاس الرديين هوجـاس
عزيز ، في عزة عزيزْ الجلالــي=ومحشوم عن طبع الحصاني والأبساس
الحـــاســـــب الآلــــــــي 
العرض العادي
