بنطلون أسود وعبايه كتف!!
________________________________________
والله هذا اللي حصل قبل شهرين
في السوق وامي ياعرب هاوشتني
واجهت وحده حابكة رسمة العين
ورموشها من غير ذنب اطعنتني
البنطلون اسود وفيها من الزين
شي تعدى العقل لين اسبهتني
غير العبايه كتف والخالق يعين
ومخصره لا والله اللي انكبتني
صديت عنها وكانوا الناس لاهين
وابليس راودني وهي راودتني
وامي تفرج في الملابس على هوين
ماهي بيمي وفي المحل خابرتني
مشخص وكاشخ وانا ماني بشين
اعجبتها وهي والله اللي اعجبتني
هي اقربت مني وانا ارحب اهلين
ومن دون ما اشعر ياعرب صافحتني
وأصل المحل فخم ومقسوم دورين
ويم الدرج رجلين حظي خذتني
إلا امي تناديني ياورع رايح وين
وفكيتها وهي اطلعت وتركتني
قالت وانا امك انت ورع إلا الحين
وبشنطه معها زعلت ولمختني
وعمري تعدى فوق سته وعشرين
ولازلت ورع في عين منهي أولدتني
وضحكت واتعوذت من هالشياطين
ومن نفسي اللي للردى طاوعتني
واستاهل اللمخه وكف وبقسين
وحسبي على اللي راحت وورطتني
بنطلون أسود وعبايه كتف!! 
العرض العادي
