إنسان متواضع وأحب الناس = دايم أعيش بطبعي الهادي
ولكل القبايل صادق الإحساس = هذي طبوع أبوي وأجدادي

الشعر أوسّع خاطري فيه لاضاق = بيني وبينه يالسنافي صداقه
أحفض جزيل ٍ مسكنه وسط الأعماق = وأقطف ورود الزهر مأحلا مذاقه

لاهاض جاشي صغت من جزل البيوت = قمت أتنقـّى ما يشوق اللـّي قرى
ماله مكان ولا زمان ولا وقوت = تارد ضوامي قلت للساري سرى

حكاية حب عاشوها ولكن للأسف ماتمّ = فرحهم مأكتمل والكل منهم فارق الثاني
فقدها فجأه وخلـّت حياته جوّها مضلمّ = وهو في حبّها هايم ولو طالنّ الأزماني

مع طلوع الشمس ونسناس الشمال = قلبي المشتاق حنّ لديرته
مبتعد وأشوفها شبه المحال = من يلوم اللـّي فقد عشيرته
ديرتي حايل بها كلّ الجمال = السعاده والفرح في سيرته

اكتب لنا ببيتين شعر .. عن ماذا يعني لك الآتي :
الأم ؟

إنحنائي لها تقدير مع إحترام = دوم أقبل يدينه ولايهون الجبين
الشعور يتسامى له بصدق وسلام = طاعة الله دوم بطاعة الوالدين

حنـّا جنودك ياوطن يوم ناديت = الشعب لبّى والشهاده أمامه
دون الوطن دون الملك قلبنا ميت = موته بعزّ ولاحيات الندامه

أحيان يغريني مع الليل السهر = وأستنزف الخفـّاق في جزل القصيد
وأحيان أقول الله يكافينا الدهر = مايستريح اللـّي ترك داره بعيد

كل شخص ٍ عزيز وكل رجل ٍ نبيـل=توئم الروح سمّيتـه كـذا أو كـذا
أحترم كل رجل ٍ دوم علمه جميـل=وأعشق الشعر حيث إنّه لروحي غذا

خوّة عمر بيني وبينه علاقات = ماهيّ بتوّه من قديم الزماني
خطيت فيه أجمل وأدقّ العبارات = عزيز له عندي بقلبي مكاني

حبيبتي بيني وبينه مودّه = بنت الرجال اللي تفكّ النشايب

يطربني الفنجال في روض ٍٍ خضر=في دلّـة البغـداد وأنـا أحّكـره
يعني يمن والهند وإيران وسطـر=وأصبّها يم أبو مشعـل وأشكـره
في جال غدران ٍ على ضوّ القمر=يطرب لها بالي على طول أذكـره

بالعمر دايم ماتندمت من شـي=ألاّ على بعدي عن ديار حايـل
بأسباب بعده هاجسي منكوي كي=ماني بجافي بس مالي وسايـل
أرتاح لامنـّه زمالي جبل طي=دار ٍ عزيزه به نصوغ المثايـل

جفني الماخوذ عيـّا يغطيه النعاس = قمت أسلهم وأنتهى الليل كلـّه سلهمه
أستفزّ الجاش والجاش يملاه الحماس = والخفوق إحتاج لإنسان دايم يفهمه

لاتعتذر ياصاحبي مأنت غلطان = أخوٍ عزيز ولك بقلبي مكانه
فيك أتشرّف ياسلايل كحيلان = بيني وبينك يأبن عمـّي ميانه

لو يميل الوقت والدنيا تمايل = مايميل من الطنايا كود عقله
دام ساس الطيب وأصله وسط حايل = تلبس الناموس دقله فوق دقله
الحواتم تهتوي طبع الأصايل = لو حصل بالوقت يالمطنوخ نقله
العوايد ثابته والشك زايل = والصخاء والجود عشنا وسط حقله
والشهامه سلم تثبتها الفعايل = والخوي بعيوننا في وسط مقله
دام أجا وسلمى به عيال الحمايل = قلبي الماخوذ لأبعدت يخفقله
حايل وحايل ليامن قلت حايل = قلبي المشتاق يأحمد شفقله
مبتعد عنها ودام البعد طايل = الصحيح لساني الصادق نطقله
ونحشم الأجواد عن بعض المسايل = ولانواخذ واحد ٍ نقصه بعقله
ولانعيل ولاقبلنا كل عايل = والهمل لازومعت حنـّا نعقله
وماعليهم زود باقين القبايل = الوفاء موجود سعد اللـّي سبقله
والنعم فيهم أقوله بالمثايل = والعلوم الطيـّبه كل ٍ عشقله
وكلّ من يشفق على فعل الجمايل = يكسب الإعجاب والعليا شهقله
والأوايل دوم منزلها الأوايل = تتعب العالم ولا واحد لحقله