بسم الله الرحمن الرحيم ،،،

السلام عليكم ورحمة الله وبركاته ،،،،

قصيده & ورد : آمل ان تنال اعجابكم ،،،


سر ياقلم واكتب سلامي على سطور == امـــــــل السطور لاتخلي فراغات

اكتب ســـــــــــلام يدفعه زايد شعور == بالعود فوق المسك شوق وتحيات

اجمل تحــــــــياتي معه ورد وزهور == للصاحب اللي ســــــابق بالجملات

من ساس جدي وابن عمي ومشهور == الجالهم لابـــــــان بالوقت ميلات

مابيك تــــــزعل وان بدا مني قصور == والا تحـــــــــاسبني على كل زلات

تصبر علــــي وراعي الصبر مبرور == يا أخوالوفاء والطيب راع المروات

قدرك ترى مبني على ساس وقصور == ولاتهزه ريـــــــــــــح حصنه منيعات

ولاتحسب اللي جرى على شي محصور == على خطط مجرى عليها دراسات

وانـــــــا على خبرك على ماضي الدور == افــــــرح بشوفك واتمناك باوقات

ولاازعل علــــى عزام لو كنت مقهور == وانســــاك هذا سابع المستحيلات

حيثك لجــــــــرح القلب عارف ودكتور == ترفــــــــــاه لاكثرن طعون قويات

ولاظن تسمع هــــــرج عاذل ومغرور == اللي يعشقون الـــردى والرزالات

وحقك علـــــــى الطيب والفعل مخبور == من عادتك حل العقود الصعيبات

ولاتلــــــــــــوم اللي من الحب مجبور == مجبور في حبـــــه ولافيه حيلات

يبيه بين الــــــــــــــناس خافي وستور == ولاتلومه وان بــــدى منه صدات

يبي يحفظ الدر عن كل جمــــــــــــهور== ويبي جميع الناس تضرب متاهات

مايـــــــــريد يسمع كلمةً تجرح شعور == وتكثر عليه الناس نشر الدعايات

وانته تعرف اللي عن النـــاس مذكور== يسعون في تفريق شمل الجماعات

كم خاطر خلــــــــــوه ضايق ومكسور == عقب الفرح مابين حــــزن وتنهات

عاش بظلامه من عقب ساطع النور == يذكر زمان فات لــــــــه تقل لحظات

عقب صفو جوه غــــــدا عج ودهور == واضــــحت حياته بين روحه وجيات

وكانك جهلت الحب بالحيــــل معذور == تـــامر ونرخص لك جميع المقامات

ولغايتك ورضاك نصبر على الجور == ونــاطى على شانك دروب عسيرات

ابيك عني دوم راضي ومسرور == وتنسى ســـــــوات الوقت في فايتن فات

واختامها يامسك بالخير مذكور == ومنكم عــــــــسى نسمع علوم جميلات


----------------------------------------------------------------------------------

الـــــــــــــــــــــــــــرد :


يامرحبا من قلب واحساس وشــعور == ترحيب مخلص في جميع العبارات

بابيات من ساسه على الطيب مذكور == شاعر ويكتب في جميع المجالات

لحظة وصلني خطك امسيت مسرور == وصار الفرح فيني دروب ومتاهات

اكتب واذا زل القلم قــــــــلت معذور == كنـــــــــــه يشاركني بهم ومسرات

كنه يقول الذنب بالــــــــــعذر مغفور == كنــــــــه عرفني يوم رددت الابيات

قل ياقلم ترا الزعل مات مـــــهجور == ماعــــــاد تربطني به ادنى علاقات

قله وقــــــله كـــــــــل مايطلع النور == اللي وهبـك الطيب رب السماوات

ادري الشهامه داخلك دايــــــم تثور == بين الـــردى وبينك بعيدالمسافات

من لابة فيها الكرم عــــــد مشهور == ربعً اهــــل نخوه وفزعه ووقفات

كـــم واحد من فعلهم طاح مكسور == بافعالهم يروون حــــوض المنيات

كم شيخ قـــال الحظ يالربع معثور == يــــرمي على حظه كثير الملامات

دخيلهم مايلحقه ضيــــــم وقصور == وعدوهم من خــــوف مافيه مابات

والرجل يخطي والخطأ شي ماثور == في عصرنا هـــــــذا وعصر الهلالات

وقلبت في صدري مواجع من عصور == فتحت لـي ذكرى على ماضيً فات

مع من جماله كنها قـــــــــــايد الحور == عاشت بقلب من القهر بعدها مات

يـــــوم فرشت لي دنيتي ورد وزهور == يومني انسى وقتها كـــــــل الاوقات

يوم الغلا في هاجس الـــــروح منثور== قبل الغلا لايصير باعداد الاموات

وانا تــــــــــرا مااسمع لنقالت الزور == اللي معك صاحب ولارحت شمات

(-----) مابـــــــاقي من الفكر مذخور== ويالله عسى ايام عمرك مسرات

معذور يـــــــــوم انك تعذرت معذور == من قلب يتحمل خطاك انت بالذات


تقبلو اطيب تحياتي ،،،

عزااااااااااام ،،،