يالله يالمعبود يالرازق البار = يامن إليه ارفع يديني بتكبير
ياحي ياقيوم ياوال الاقدار = رُحماك ربي بالسنين المداهير
الْطف بنا لطفك على كل ماصار = فيك استجير ولالنا غيرك يجير
العبد يخطي وانت يالله غفار = عفوك الهي ياعظيم التدابير
نرجيك ياجزل العطايا بالامطار = نرجي جنابك مارجيناه بالغير
انزل علينا الغيث يالله مدرار = غيثاً مغيث يعم الاوطان بالخير
يحيي الهشيم اللي عليه الدهر جار = والارض تلبس زاهيات النواوير
ويذْكَر به العربان من عقب الاخضار = وكلن على ربعه يسوق التباشير
وكلن مكانه لاتعدى ولاسار = يشبع حلاله ماخسر به مخاسير
وانا هواي اليا تخيّرت باختار = هاك الفياض المعشبات المخاضير
ياماحلا في حدها شبة النار = اسحب من الملّه والزّ المباهير
صِفرٍ تمناهن عقب قطع الاسفار = هذي وهذي كنهن بطوابير
فنجالهن سُوّي على كيف دوار = دربه بعيد ومتعبته المشاوير
مع خوّة اللي لاتنخيت به ثار = عبدالرحمن اليا ذكرت المناعير
وانا على وصفك وانا خوك باحتار = اخاف من وصفٍ يجي فيه تقصير
نبي لنا من عرض الايام تذكار = عشرين يوم نمتّر القاع تمتير
من حد لينه للخشيبي لسنار = ومنّه على انبط ثم عذفا وابوسمير
ونغير الوجهه على حسْب الاذكار = اما سنودٍ او رجعنا محادير
بارضٍ بها للصيد مدْرَج ومعبار = بارضٍ خلا.. يسعد بها راعي الطير
نلقابها زِرْق الغلب درْج وطْيار = ولاّ مع الجِرْه زحوف ومخامير
والطير عندي واحدن من هل الدار = انا اشهد انه له معزّه وتقدير
ادراه عن صلْف الهبايب والاخطار = ولا ينطبق جفني وهو فيه تكدير
(ذيبان)لاردة على فعل الاشرار = يطري علي حربٍ بها سالم الزير
له بالحباري سطوة الحاقد بثار = ماهو بيرحم عنده الحكم تعزير
ان كان طارت اوهي بالقاع مادار = مترهّيٍ ماهو مثل طير تسبير
لاطار خرْبه ثم سرّب بالانظار = وقام يتصفّق في يمين ومياسير
واستامن علوّه على بعد الامتار = خربٍ خريش وسابقٍ له معاشير
ادواه في كفّي بلاسابق انذار = (ذيبان)لاشخّص نظيره بتقرير
يرقى عليه وشايل بكفه اسرار = عن حكمة المولى لضرب السواطير
ماهو بجير ولامن طيور سنجار = طيرٍ حمر كله على دار مادير
فِج الثنادي وافحج كفوفه كبار = وسْرَه جليل ووافي وساقه اقصير
لامن نظرته لد في شوفه الحار = يمك تقل في نظرته فيك تحذير
له نظرةٍ يقدح شراره كما النار = نظرة عقيدٍ والسْريه طوابير