على طاري العشاق والليل والديجور = سرى خافقي مسرى ضريرٍ يجر خطاه
وأنا قبل لا أعشق كنت غارق غبب وبحور = وعيبٍ على شرواي يزفر أنين واه
سلامن من دياري إلى قبره المعمور = إلى قبر شيخن ماتمد الهزل يمناه
زرعني بأرض المرجلة والخصال بذور = وقفّى عسى ربي يسهل حثيث خطاه
إلى جنة الخالق وفعله هنا مخبور = عساني إليا قفيت مأواي هو مأواه
تعلمت منه الطيب لامن لفوه حضور = وسلكت الدروب اللي تؤدي إلى ممشاه
أجمّع حروف الشعر طابور مع طابور = عساها تجي في قدر من مثله وشرواه
وحزن المقابر والحساب وقصير السور = تخطيتها مسرع عسا بالخيال ألقاه
قبل خمسة أعوامٍ مضت مع ثلاث شهور = فقدت الأبوة والحنان وأمل لقياه
أشوف البشر تلفي فقيرٍ معا مشهور = عليها الحزن بادي ولو له شموخ وجاه
يعزونني ماجور ياذا الفتى ماجور = وأنا صغيرٍ تايه غرق في حزن بلواه
عسا من فقدته قبره من الوبل ممطور = تجرعت حزني والأسى من عقب فرقاه
شماغه عبق ذكراه لازالت بهالدور = معي وين ما أقفّي تجي متعبة ذكراه
عسا في جنان الخلد حوله كواعب حور = عسا ماتمر النار بالآخرة ماطاه
عسا مايشم إلا مسك أو صنوف زهور = وعسا عيشته أشهى من لحوم هبر الشاه
وأنا عبد منهي عن تسخط ونوح الزور = ماغير أرقب الواقع وعيني تصبصب ماه
أمر الحزن شامخ ولو عاندن صيوّر = أجي للحياة أشباه وأقفي بدون أشباه
تموت الأبوة بس يبقى الأمل محفور = بلب الخفوق وليلة العيد ماتمحاه