ياهيه لوبررتلي كل الاعذار =
=يبقى لي الواقع يقول الحقيقه
والصيت يبقى والفنا حظ الاعمار =
=والوقت يغرينا ويجذب بريقه
اصغي وانا باقولك والخطا صار=
=والعذر مادواى الجروح العميقه
ماهي سوالف ينقله شخص ثرثار =
=الادمانا كل يومن يريقه
طعنت قريب جاوز حدود الاسرار =
=وحطم تماثيل العهود الوثيقه
ولاهي توافق راي في حكم الافكار =
=الاعلى ماقيل نار وحريقه
وانا على الطاروق في وجه الاعصار =
=لحظه يغيبنا ولحظه نفيقه
ابحتريه ان حرك الريح الاشجار =
=واعاتبه مثل الصديق لصديقه
واليا انتصف ليل العنا عفت الاشوار =
=وحملت نفسي فوق مالاتطيقه
قلت احملو نص الخبر ضمن الاخبار =
=للشاعر اللي مايبور برفيقه
على الذي اسرع من الطير لاطار =
=وارق من حلم القلوب الرقيقه
بي ام وان قالو هلاالصنف مشوار =
=ترجح موازينه ويربح فريقه
الياسرت هانت مسافات الاسفار =
=ماكن يوجد بالسفر مايعيقه
واستغفرالله لامشت كن الاقدار =
=تمشي على كيفه وتتبع طريقه
جوانبه تعطي على ضو الانوار =
=بحرٍ غدت فيه البواخر غريقه
اليااقبلت غيمه تبشربالامطار =
=والياادبرت ليلٍ سرته الخليقه
من حائل المسرى عن عيون الانظار =
=النفس حره والنوايا طليقه
ياسايقه يامسندي يابن الاحرار =
=انت الشقيق اللي يهمه شقيقه
وصل وصايا صاحبك وانت مغوار=
=واحسب مشاوير السفربالدقيقه
وان جيت راع الجود في وصف الاذكار =
=عطه العلوم اللي روت بالسليقه
هذاك ابوصالح الياضاق محتار=
=ياقف مواقيف السباع المويقه
اخوي وان دق الجرس صوت الاخطار =
=يجلي عن قلوب المشقين ضيقه
قله وصلنا لعبة القط والفار =
=واهل الجدايد يجلبون العتيقه
الريح جابتهم من حدود الامصار =
=وصار النحل يدفع ضريبه رحيقه
سوالفن ماهي عن صغار وكبار=
=الاضياع اهل الاصول العريقه
وكان الكلام اللي بدى يجلب العار=
=البريابس والحديقه حديقه
عندي لهم علمٍ عن الحرب والثار=
=وحقايقٍ في محتواها دقيقه
واليوم ندمحها على شان الاخيار =
=وان عوّدت دم المخوه نريقه
واقبل حروفن نصها نزف الاشعار =
=مضمونها وصف وخيال وحقيقه