يوم نشدوني عن دموعي و أنا أمك
جاوبتهم و أبعدتهم عن طواريك
ما أبغى أجرحك بكلمه تزيد همك
و ما أبغى أقول إن السبب من تجافيك
يوم لمست الصدر في يوم ضمك
نسيت أنا اللي حولي و قمت أبكيك
ما أدري أنت عايش و أرتجي لمس جسمك
أو ميت و أقول يرحمك واليك
يا ما سهرت و زاد غمي لغمك
ما أرتاح لين تهتني لياليك
و يا ما إذا طولت في نومك أشمك
و أتأكد إنك عايش لي و أرجيك
و يا ما زعلوا مني خوالك و عمك
و يا ما هجرت أقرب قريب ضحك فيك
و يا ما ذرف دمعي لا سال دمك
براءة الأطفال ما هي بتنهيك
و يا ما انتظرتك عند بابي و أنا أمك
و أقول في يوم تجيني و أحييك
أخاف يوم يجيني يغمك
و يجيك علمي مع عزيز يعزيك
أنا على الله داخلة ثم لمك
ارحم قلب تالي الليل يشكيك
فكر بمن هي صابها الضيم و ظلمك
و اذكر حشا ضمك و عسر المسالك
ودي أشوفك قبل يومي و يومك
لو مرة بالعام الله يخليك
ما أبيك تقطعني إذا أمري يهمك
بأقعد معك أضحك وأسولف و أحاكيك
يا وليدي اذكر كلمة قالها فمك
لا قلت كلمة يوه قلبي يلبيك
و اذكر زمان به فراشي بجنبك
و لا شكيت تقول يمه و أسليك
و لا أشتد ما بك فوق كتفي أزمك
ما أرتاح لين ربي يعافيك
و الختم لا جتك الرسالة و أنا أمك
يمه تجي و لا أنا أزحف و أجيك
قصة مؤثرة 
العرض العادي
