بعد الغياب لكم وأنتم في القلب دائماً نص يرقى بكم كأمنياتي أن يرقى لذائقتكم
مقدمة النص إليها أقول
كنتي تحبين رباب وكنت أعشق فيروز وبين الصوتين رحلت إليكِ البارحه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،، ،،،،،،،،،،،،،،،،
بيـن موالات فيـروز وعذوبـة ربــاب=هاضت الذكرا وقلبـي طـرا لـه ماطـرا
وبين ترحـال ومنافـي وغربـه واغتـراب=ضاعت ادروب المداين وضيّعت القُرى
وانتي /الضيقـه/ وعبـره / وحرقـه/ واكتئـاب=إن ضرا قلبك علـى البُعـد قلبـي ماضـرا
والله ان القلب مـن جمـرة الترحـال ذاب= (لِعْن ابو) قلبـك تجبـّر بِظُلْمي وافتـرا
والسؤال اللي يدوّر علـى ثَغْـرِكْ جـواب=يحتضر مـن نزف جرحـي وقلبك مـادرا
يا غصين البان بيـن الرجـا بـك والعتـاب= ضَيََيَعَتْني سالفـة (يَا تـُرى)( يَاهَـلْ تـُرا)
مدري انتي غلطة العمر ولاّ انتي صواب= كيف اسوق الرجل قـدّام والْقاني ورا
صارت الدنيا بعيني خرابٍ في خراب=وللمواجع في خفوقي خطيب ومنبرا
وامْحَلت قاعي من الجدب وعيونك سحـاب= عَلِمِيها ترحـم البيـد وِتْبِـلّ الثـرا
واجبريها تسقي الروح وينولـك ثـواب=لاَ تِقَوْلي رَوَّح المِزِنْ والبـارق سـرا
والله انـي لابـس الصبـر لبسـي للثيـاب=ومن غرابيلك وصدّك جـرى لـي ماجـرا
كيف علمتيني النوح فـي طـول الغيـاب=كيف ترضين بعذابي وجرحـي مابـرا
لعن ابـو جـدّك والايـام بغيابـك عـذاب= والسهـر يِجْرِم بعينٍ مخاصمها الكـرا
بس اعدّ ايـام هجـرك واضيّـع بالحسـاب=والزمن في سوق الاوجاع بي باع وشرا
صرت مثل الظامي اللي طرد وجه السراب=لاَ فرح في في قطرة المـا وَلاَ حَصَّـلْ ذرا
نَاظِرِي عيني كِمَا الغصن في حضن الضباب= والجـروح اللـي بجوفـي تزيـد وتكثرا
شوفي احزاني بعينك حروفٍ في كِتاب=واجبري كسرٍ بضلعي لعلّه يُجبرا
عوّدي يابسمـة العمـر يامـزن وسحـاب=لا تقولي روّح المـزن والبـارق ســرا
عبدالله سماح المجلاد
أمحلت قاعي من الْجَدْب وينك ياسحـاب 
العرض العادي
