فجعتني الأقدار بوفاة إبن عمي يوسف بن حاكم المجلاد قبل خمسة ايام بعد معاناته الطويله مع مرض السرطان وهو في ريعان الشباب جعل الله مثواه الجنّه وموتى المسلمين وهنا كان لي من الحزن نصيب تركت مشاعري تبوح به وأطلب منكم الدعاء له بالمغفره وجميع موتى المسلمين
مايِرْجِعْ الْمِيْتْ كثر الدمع والأمنيات =والموت يعني نهايات اللقا للأبد
والنيل ،والعاصي ،ودجله ،ونهر الفرات=اغرقت فيهن على فَقْدَكْ فجوج البلد
تَحَدَّرَن من منابع هالجفن جاريات=وان جَفْ مجرى نَهَرْ فيهن طَلَبْت المدد
حتى لِبَسْت الحِزِنْ غتره، وثوب ،وعباة= في ساعة الدفن والموضوع قبر ،ولَحَدَ
هنا تأكدت من مَوْتَك‘وِهَجْر الحياة=وهنا ركع حزني الواقف،ودمعي سِجَدْ
وبديت اتمتم واهذري يوسف اليوم مات=والموت يقضي على شايب وبنت وولد
والبارحه مَرْ ،لك(سيره ,وطهر ،وصلاة=واهْدِتْك عيني سحابه دون برق ورعد
بكيت يوم انت صرت بعالمي ذكريات=وماعاد لك نجم في عالي سمايه صعد
وانا ادري الموت مَالَلْحَيْ مِنَّه نجاة=وانا ادري انِّه يجي وَلاَ يِحَدِّدْ وعد
وانا ادري ان العمر زايل وكم عام فات=لكنّي اجهل وش اللي باقيٍ من عدد
وحنا على تربة الدنيا مجرد نبات=أرواحنا الزرع والفلاّح موتٍ حَصَد
ياكتلة الهيبه اللي في لَحَدْهَا شِتَاتْ=ياصاحي الفكر كيف الفكر نام ورقد
لك قامةٍ شامخه وشلون صارت رفاة=ياذايع الصيت كيف الصيت فجأه هجد
ماجيت اعدد مزايا فيك واذكر صفات=لأنك أكثر من التوصيف واكبر بعد
جيت انثر الحزن وانخى الدمع واقول هات=دخيلك انثر سحاب الدمع اَشَدّ وأشد
فيني من الحزن مايشبه جبال السرات=وفيني من الضيق ضيقٍ فوق ضيق ورِجَدّ
هنا هنا بين حدب اضلوعي المرهفات=حتى غدا الحزن حبل وبالضلوع انعقد
يارب يارب طَالِبْك الصبر والثبات=يارب جَمَّلني ابـْ(صبر )وبقية جلد
ويارب لك جنةٍ بيبانها واسعات=وانت الغفور الرحيم ،أنت الأله الأحد
يارب تكتب ليوسف في جنانك حياة= وتغفر لعبدٍ بِوَحْدَانِيِتَكْ لك شَهَدَ
موحِّدٍ /صام /حج/ادى حقوق الزكاة=وصلى لوجهك وَلاَخَانْ ابـ(حياته عهد
هنا تأكدت من مَوْتَك‘وِهَجْر الحياة(مرثيه في وفاة إبن عمي يرحمه الله) 
العرض العادي
