ماجور يا رجل بدا فيه خله=حلقه يبس من خير والشر فاته
خويه الاملس صلاته فطن له=رجل صدوق ولا كذب مع شفاته
يقول ابو ناصر كلام يدله =قولي بثاني بيت هذا ثباته
كبر يصلي وانتبه صاحب له =الشيك في جيبه ويكرب عباته
يرجف شنق صدره تقل فيه عله=حمى فرح بغت تصرم حياته
يده على المخبا عسى الله يحله=والى سمع مشيء يبين التفاته
وشلون بالمسجد تقل فوق مله=آمنت بالله كيف يبست لهاته
نفسه على جمع الدراهم مغله=ومن جمعهن وشلون يخرج زكاته

دعواك يافهيدان لا زم نعله=والقيل والقيفان خذها وهاته
هي عادة العايل لزوم ندله =ورد الجزاء يالقرم حاضر حلاته
الشيك اخذته فيه سبعين كله=والفضل لله ماجحدنا غناته
نبي من الخفرات بنت بفله=عين العنود اللي بقفر فلاته
وانته على فقرك رمادك تمله=مع العجوز اللي كبرك بناته