قلت القصيد اللي تنظم بالابيات=من هاجسن لاقال جزل ٍ مقاله
واللي حداني للمثايل محاكات=وضع نعيشه في زمان الجهاله
حال البشر معروف فيه اختلافات=بين الخطا وبين الصحيح ومجاله
بعض البشر لاشال شال الثقيلات=يحسب من اهل المعرفه والشكاله
وبعض البشر جنب طريق الصعيبات=لاصك بابه راح دور بداله
وبعض البشر يقطع طويل المسافات=للعلم يسعى لو صعيب ٍ مناله
وبعض البشر ما حقق أدنى الشهادات=ثم يشتكي للناس وضع البطاله
وبعض البشر ماتفيد فيه الجمالات=مايحفظ المعروف لاهل الجماله
وبعض البشر ينفق ألوف الريالات=يمدها لمحروم يخفي سؤاله
يرجي ثواب اللي تعلى السماوات=ولاتعلم اللي في يمينه شماله
وبعض البشر يجمع من المال ثروات=حتى يموت ويهتني به عياله
وبعض البشر يعطي حياته مقاسات=ويفصل الدنيا على قد حاله
وبعض البشر بالدين عدى مدارات=وضعه وجاوز قدرته واحتماله
يقلد اصحاب السمو والسعادات=وان حل دينه جاب دين ٍ بداله
وبعض البشر يشبه جهاز الاذاعات=حكيه كثير ٍ والبلا في جداله
وبعض البشر لو تسأله رد بسكات=ثم هز راسه والإجابه محاله
وبعض البشر إليا تحدث بكلمات=كِنـّه منقيها من الفين قاله
وبعض البشر محتال راعي حيالات=يزداد فقره بإزدياد الحياله
وبعض البشر سطر للامجاد صفحات=والناس تذكر سيرته مع نضاله
وبعض البشر ينقل كلام الإشاعات=من وين ماجته السواليف قاله
وبعض البشر ياكود يعطى ضمانات=للسالفه من شان ينقل مقاله
وبعض البشر مايعترف بالصداقات=ماقدر الخوه وحق الزماله
وبعض البشر خوة مصالح وضحكات=وعند اللزم تقفي ركايب جماله
وبعض البشر مايبين وقت السهالات=وان حلت القاله يبين بفعاله
تكفون ياأحفاذ قارين الآيات=حيدو عن دروب الخطا والظلاله
وامشوا طريق الحق واهل والصلوات=لاتغركم دنيا سريع زواله
وصلو على خاتم جميع الرسالات=بعداد ماخط القلم بالرساله