يا زين وقتن فات ما هوب هالحين=يـوم النوايـا كلهـن صافياتـي
و الحقد ما يوجد و دايم سعيديـن=ونفوسنا سمحـة وسكـر نباتـي
و بيوتنا ونسه و لا به شياطيـن=ما يدخله صـورة ولا منكراتـي
و يطرد ظلام الليل عنا سراجيـن=و أحيان يقضي قازهن طافياتـي
مشروبنا صافي من الزير ولبيـن=ماهوب مستورد سريـع الفواتـي
ما صنعوه الغرب يا فالهم شيـن=مابه مواد الحفـظ و مسرطناتـي
وعشينا مرقوق بيـن العشاويـن=تحطه أمي قبل وقـت الصلاتـي
لقمة هنيه طيبـه طعمهـا زيـن=تحوفهـا بيدينهـا الطاهـراتـي
ثمن ننام إلـى قضينـا مصليـن=بعد العشاء كلـن يريـد المباتـي
وأمي تنومنا بزيـن السباحيـن=سوالفـن مـن عندهـا طيباتـي
ننام من بدري ونصحى نشيطيـن=بعد الشروق أشغالنـا جاهزاتـي
ما به كسل لأشغالنـا مستعديـن=ما عندنا سايـق و لا خادماتـي
نلبس بيوم العيد ثـوب السباهيـن=و أم تحنينـا نمـاري البنـاتـي
مقيالنـا بمجببـن بيـن بابـيـن=فيه الهواء يطرق جميع الجهاتـي
نشب نـارن بالشتـاء و متدفيـن=مـا فيـه دفايـات و مكيفاتـي
يجي المطر و ثيابنا تنتلي طيـن=و نلعب جميع عيالنـا و البناتـي
يصب مثعبنا ونملـى المواعيـن=يا حلو ذاك الماء و ذيك الحياتـي
ماهي حياة الحين ياشين هالحيـن=كله غثـاء وهمومنـا كاثراتـي
كلش يجي لك لو بكلمـه تناديـن=كلش توفر بـس مابـه حلاتـي
صلاة ربي عد ما ترفـع يديـن=على محمد صاحـب المعجزاتـي
تحياتي للجميع
كــ الـغـلا ــل
قصيده رووووووعه 
العرض العادي
