رميت بالبارود وأخطيت بإييدي= لابارك الله عرفتك من رمايا
حققت بالمنظار ونشنت صيدي = ولي عادة رميي يسوي سوايا
يوم التفت ذاك الغزال الفريدي= وفر النحر كنه نوابي نوايا
بانت ملامح عنقها والوريدي = وصفحة جبين لاشعق كالمرايا
رق الشعور ونبض قلبي يزيدي = وصابتني الرعشه وجاني بلايا
وضاعت علومي يوم شد الشديدي= والمحترف صارت علوم هوايا
وراحت بي الأفكار لخلٍ بعيدي = به من وصوف الريم طبع وحلايا
عين وخد وقد وعنق وجيدي = وملامحه شفته بكل الزوايا
الله عليها لازهت بالجديدي = تفرق بنات الناس طبع ومزايا
ودارت بي الدنياء عكس مانريدي = وشاطت شجوني وامتحني عنايا
لايابو سالم مسندي ياعضيدي = عفت القنيص وعفت طعم الشوايا
وبديت ابدع في قوافي قصيدي = وأنسج من حروفي قصيد وروايا

هب الهبوب وهزّ خضْر الجريدي = واتمايلنّ عذوق قافي ملايا
بواسقٍ شُمّخ وطلعه نضيدي = من طيبها حمْله تشيله رهايا
هلا هلا مليون ولاّ يزيدي = لابن نعام اسوق عذب التحايا
وانا احمد الله لك من اقصى وريدي = لك بالسلامه ياخطتك الخطايا
وادعي لك الله عل عمرك مديدي = ياشاربٍ مادنّسته الرزايا
وان كان ضبْيك ذكرك بالبعيدي = فالله يجمّع مبعدين النوايا
وان كان ماجاتْك على ماتريدي = فاصبر ولا للعبد غير الرجايا
والحمد للي لاشكرته يزيدي = عينك بعينه هو جزيل العطايا
والصيد يابو حمود لو مايفيدي = أخير منّه ترْكته للفضايا
وانا لك ابشر والسما له رعيدي = لامن تخالط وادْيَه والشغايا
اجيك سيلٍ دارجٍ له زبيدي = تدفعني الخوّه ودم الطنايا
يوم ان بعض الناس نومه سهيدي = انا لك اسري لاعونّ السرايا