هذه كميّه من الشجن العاطفي انسكبت شعراً في كأسي الشعري فلم يطيب لي أن أتذوقها بدونكم لأنكم سكرها وأجمل مافيها كجمال حائل نت بكم( أهداء خاص لمجموعة العقد الفريد/ ولكل من في حائل نت)
(حبيبه )مابقى لي من رحل طَرْفِك وطن وبلاد=(غريب) وطال مسرى غُرْبِتِي وعيونك ابلادي
مصا يب جت جميع وكنت متمنّي تكون افراد=وآنا ما لي خيار ان جت جميع او كانت افرادي
أنا من يوم غبتي صرت لفنون العنا معتاد=وغَدَيت ابْ(عين) وقتي (والدٍ )وجروحي (اولادي)
أقول الحزن خَف،وحزن مجروح المسافه زاد=واقول الدرب يقصر والمسافه دوم تزدادي
اصدّر من ينابيع الألم وارجع لها ورّاد= (كِذَا اقَزِّرّ) غيابك بين مصداري وميرادي
أنا وانتي ضحايا والظروف القاهره جلاد= مصيبه يوم صار الوقت هو خصمي وجلاّدي
أكابر في غيابك واتحاشى نظرة الحساد=وأقول الأمر عادي والأكيد انّه ماهو عادي
أنا ابغى اقول حاجه ياوطن روحي تصدق عاد=بقلبي شوك بُعْدَكْ يِسْتِفِزّ (الفُلّ،والكادي)
وانا لاَ مِنْ ذِكَرْتِكْ سالف اجروحي تعود اجداد=وانا الذكرى رفيقة درب في صَحْوِي وِمُرْقَادي
أشوفك لاَ صَحَيْت وفيك حلمي ساعة المرقاد= (لِذَا) تَرْجَعْ لي اجروح الزمان الماضي اجدادي
تِذَكّرْتِكْ وانا لي في بحور العاطفه ميعاد=واشوفك في عيون الذاكره تركض لميعادي
تسابق ساعة الوقت وتِمَنّى والْمُنَى مافاد=وانا مثلك أسابق ساعتي والموعد الوادي
وُصَلْتْ ومَا لِقَيْتَك وانتحر في لحظة الميلاد= (رِجَا عين ٍ ) تمَنّى شَوْفِتَكْ يالفاتن ،الهادي
تذكرتك وصورة عبله اتوادع وَلَدْ شدّاد=وانا في واقع امري للمتاهات اطوي اشدادي
تذكرتك وانا اسمع صوت ابو نوره شَدَا بابعاد=ولِمَسْتَكْ في خفوقي واحْتِضَنْتَكْ داخل افوادي
(يا أوّل) مِنْ سِكَنْ حِدْب الضلوع ابـْ(خانة الأحاد)= (يَا أخِرْ )مِنْ قَتَلْ فِيَّ الِرضَى واستنزف اعنادي
(يدور الوقت )لَكِنْ مَا نَقَصْ حُبّك وِفَيْضه زاد= (يمرّ الليل) (وثياب السهر) تستطرد اسهادي
يا ليت العمر يرجع والسنين اللي مضت تنعاد=لاَ اشيلك سيف واقطع في رضاك الْ(سان)حِسّادي
واقول البلبل اللي طوّل الغيبه لِ(غُصْنِي) عاد=واجي وامسح بِكَفّك عن عيوني حزنها البادي
واقول امر / تدلل/ يا لغلا / واطلب وانا سدّاد=وَلَوْ تَطلُبْ عيوني قلت خذ ياغاية امرادي
ولكنّك رحلت ومع رحيلك جت بلا تعداد=جروح ٍ في ضميري مَا لَهَا حصر ٍ وتعدادي
متى ترجع ويفرح في رجوعك قلب ابن مجلاد=وتهز غصون قلبي بالوصل يالبلبل الشادي
عبدالله سماح المجلاد(أبوبسام)
أنا وانتي ضحايا والظروف القاهره جَلاَّدْ 
العرض العادي
