الليل أوغل ورا الحـدب المهاديـف=وأنـا أتستـر ورا شـرد القوافـي
أخاتل الحلم خوف من الصودايـف=واربّي أوطان واقهـر بـي منافـي
أحلامي شراع وأقلامـي مجاديـف=والبحر حبري,وصفحاتـي غوافـي
أحيان أقول الغرق/يتلعثـم الزيـف=وأحيان اسخر وأقول:البحر وافـي!
والبُعد يـزرع مسافاتـي تجاويـف=حتى يكون السمـا حلـم اكتشافـي
الدرب موحش وآهاتـي مشاريـف=تُفتِّـق الجـرح وتبيـح الخـوافـي
يا نائيـة لا متـى يتعربـد الطيـف=وتذبل عيونـي ويشربنـي جفافـي
والبرد يستدرجـه لغوايـة الصيـف=والعذر منبـوذ فـي نـزوة كفافـي
الغصن تدوين يـا مرثيّـة الريـف=والعذر تدرين هـو غـدر السوافـي
بالصدر وينك,بصدر القافية "كيـف"=والعجـز إحباط/والمُحبـط لحافـي!
وأنا أتوارى عن عيـون الملاقيـف=واقـرأ بنزعاتهـم سـرّ اختلافـي
واللي ورا النبض يا محبوب ما شيف=صوتٍ صداه يتحشرج:بس كافـي!
والبارحة كانـت غيومـه مراديـف=تصبّ ظلمـاه بصـدور المرافـي!
والأرض تشهق يباب,وجالٍ منيـف=ويثرثر القحط, يـا خيبـة قطافـي
وأنا هنيّا مابيـن النطـع والسيـف=أخمـن العمـر وأسـوارة طوافـي
وأنـتِ تسنّيـن للمظمـاة تعريـف=وترمّليـن القـلـوب ولا تخـافـي
صحيح طعناتك لهاويـك تشريـف=يـام الحـراب الأنيقـة والرهافـي
ومادام مدك قليل ووصلك صخيـف=ما كان مفـروض تثليـث الأثافـي
والحب لا صار شـذرات وتناتيـف=لو تلبسه جوخ وصل يظـل حافـي
والشعر بحرٍ عميـق وبـرٍ مخيـف=شكٍ مثل برد جـرح وسـر دافـي
والليل شُهـبٍ توغـل بالسراجيـف=وأنا مـا غيـر أتزّمـل بالقوافـي