.
لا شفت انا الرُّبع بيدين الوراعيني=كن الهواجيس تجبرني على اقصاها
أسجّ سجّة غريمٍ ضامه الدّيني=شاف الهوامير بالاموال تتباهى
الرُّبع شفّي ومنية قلبي وعيني=وامراد نفسٍ دروب الصيد تشعاها
لو طاح يومٍ من الايام بيديني=بورّده ديرةٍ تكثر بلاياها
من حدّ عيسوم واحْلِيّ البراكيني=الى البلويّه و ما ضمّت من اقراها
ياويل قلبي من افكارٍ تجزّيني=لا حضّب النوم جتني تسحب اخطاها
تعرض على ناظري روس العناويني=معها صور اروع الايام و احلاها
أحسّها احلوم وقت النوم تشقيني=ياجيرة الله من الدنيا ومسعاها
لولا البراهين واربوعٍ تخاويني=كذّبت نفسي الى من حلّ طرياها
يابو حمد والليالي ماتراضيني= واظن تركي كمانا يطلب ارضاها
الله على الرُّبع توّه وارد ألحيني=نقش الكفرات كيلو ماتوطّاها
أشهب الى جا رمال الجوّ مايبيني=مرّ المعظّم وكنّه صدق ماجاها
صحيح مابه فخامات الصواليني=ولا هُدُوّ الكبارس حين ممشاها
لكنّه ابحق فيه اشياء تغريني=وتغري اربوعٍ مقانيصي تمنّاها
لا صرنا من دون جرف الشيح ممسيني=والنار تعكس قزاز الرُّبع بضياها
وعقب العشا وانْ بقى بالليل ثلثيني=قمنا ندوج الاسامر ونتفلاّها
احوفها حوف من عرفي وتمكيني=واجسّها جس وانظم لك شغاياها
والى اخطمت مثل برّاق الغواشيني=دوسه خفيفه واحط الجيب بحذاها
ويطلع لها اللي خبيرٍ بالنياشيني=تركي برميه يزوّرها مناياها
في بندق الرّوس امّ المنظر الزيني=سوداً كما الليل تعجبنا حلاياها
وان قاشر النور جزّام السراحيني=واقعى عقب ماتنصّى القور بشفاها
وارسل لنا حمرة عيونه يناديني=مستوثقٍ من أمان الارض واحماها
اخذت يسراه وابرمته على ايميني=لين انّه آمن على نفسه وهدّاها
وفجأه من اقصاه جيته مانظر فيني=إلاّ وعيني قِدِم عينه من ادناها
وانداش عقب الرّها واقفى مع الليني=واغبار رجله يقول الناس وش جاها
عقب الشجاعه وغارات المعاديني=ياذيب عوّدت لا قوّه ولا جاها
ياذيب أول وليل الناس ليليني=ياما افزعت لك مخاليقٍ من اغفاها
واليوم والوقت قلاّب الموازيني=اصبحت خرقه على السكّه رميناها
ولا ذبحتك ترى من قلّ تثميني=قدرك بقلبي مثل صارات واحجاها
لكن زمانك تنكّر للعزيزيني=واللاش والكلب عند الناس ما اغلاها
واكره انا القاك مكسور الجناحيني=يحدّك العُوز تاكل من دناياها
الموت مكسب ولا عيش الدّنيّيني=ياذيب الاعذار تكشف لك خفاياها
وانا لو الموت حِلٍّ كان يرضيني=موتي ولا شقوة الايام واغثاها
ابو حمد ريّحك كفّه بثنتيني=والباهلي لاشتهى الحاجات سوّاها
صوّرك صوره مجمّلْةٍ بتلويني=وبعد التفلسف خذا البندق وعبّاها
ومع طلّة الفجر نادونا المخاويني=ترى الوعد طلحةٍ حنّا لقيناها
يابوعلي هات الاحداثيّه على هويني=لما انسجل مضامنها ونقراها
وعقب التقينا تحصّل شوف عشريني=والصيد من حسبة الشوفه نصفناها
واكبر ضحى صوّت المعزّب للادنيني=هذي قهوتكم يفوح البن من ماها
وهاتوا لي جزْلٍ من ا لحذرات واسميني=نبي نترشّف مرقها وانتغدّاها
يقولها قاصدٍ نفسه وهو اذْهيني=عطوني اللي رمى تركي ولا اخطاها
وتكاملت فلّة الربع المياميني=الجو كايف ولحظاتْ انتمنّاها
ثلاثة ايام ونوب نزيد يوميني=تال الشهر لا تكامل لون ظلماها
طلعة نشامى طراها في شراييني=ادواي وكيفي .. وكيف الرّبع وادواها
واليوم عنها مضى للربع عيديني=وارجي من الله يعجّل وقت مسراها
..
.
.
الجيب الـــرُّبـــــع والذيــــب ... 
العرض العادي
