للقصيد ازمان بالي يقبله = واغلب الاحيان مالي به هوى
اجمع الجزلات واحت سبله = واكل عذوق النخيل بلا نوى
واصعد المرقاب في راس جبله = واستجيب لذيب جوفي لاعوى
لاطرى ذيبان في بالي وله = ترتجف حدب الضلوع بلا هوى
واهني اللي عن حزونه دله = مستريحٍ مايدوّر له دوى
آآآه ياذيبان عمرك باوله = ليتك شوي انتظرت ليا ذوى
احسب ان الموت اقسى مرحله = ياعلي واثره يهون ليا كوى
ياعلي كله صحيح الا اسفله = ماسلم كفّه تعقّد والتوى
وانطويت بقصةٍ كان بطله = وانطوى طيري وحزني مانطوى
ربي انك ياعزيز المنزله = تبري اللي حبه بقلبي ضوى
المكان اللي سقاني حنضله = واعساه النجم لامنه هوى
واعسى يمْحل وطاه ومدهله = ياخذ سنين ودهور وماروى
حيثه اسرف بي عذاب وبهذله = نيشن بصدري صوابه مازوى
ميّل بخدي وسومه وعدله = ذاك منّه...ناظر الرمش انشوى
ابتدي بالذّكر وانسى البسمله = بالصلاه وكل قلب وماحوى
كني اللي له زمانٍ عن هله = لاجبر كسره ولا عوده قوى
ويوم زان الحال والعلم وصله = جاهم الموت وتوفاهم سوى