أودعك..روحي عساها تساهيل = عسى دروبك وين مارحت طابه
تودعك عين دموعه هماليل = تذرف دموعه مثل وبل السحابه
ويودعك قلب لنبضه مراسيل = يرجف خفوقه فوق طبلة عذابه
ويودعك شعر قصيده مواويل= يجاوبه مسحوب قوس الربابه
ويودعك ليل غدى عقبكم ويل = يوحش ظلامه صار هم وكآبه
ويودعك ورد غصونه مذابيل = جفت جذوره من سوافي ترابه
ويودعك صبح بزوغه كما الليل = ضاااع النهار وساد به جو غابه
ويودعك شمس غروبه غرابيل = لا بدر نسهر به ولا ينسرى به
ويودعك عطر عبيره كما الهيل = في علبته مدفون مايندرى به
وتودعك بسمه غدت بس تمثيل = محبوسة الآهات عقب الطرابه
ويودعك هرج السمر والتعاليل = ماتت حروفه والمرح والدعابه
ويودعك جسم عجز يقدر الشيل = تهزه الذكرى لو الطيف جابه
ويودعك كف بقى فيه منديل = عليه من كحلك رسوم وكتابه
ويودعك (اجا) والأشواق بالحيل = تصارع أحلامه ويكبر صوابه