يقول الراوي اللي سار جزل القاف في طوعـه
تقول انه على نبع القوافـي تسجـع اوتـاره
دواوين العرب كنه بوسـط الصـدر مطبوعـه
وتشهد له رجال الصدق في عبـده وسنجـاره
زهور القاف في روضة ضميره تقل مزروعـه
واذا دارت دواليـب القوافـي يلقـط اثمـاره
يحوز من القوافي ساس نبع القاف وفروعـه
وجاشه ضاري(ن)وسط البحور الهوج واخطاره
قوافي ضامرن خالف كثير النـاس بطبوعـه
ولا يبني على تقييـم ناسـن بالعـرب غـاره
ظعونه مامشت تتلي هزيل الحـرف ونجوعـه
واذا عطشت حروف القوم جاشه يفجر انهـاره
عقب ماشاف شعر الناس ضمن شراه وبيوعه
وهذا هو سبب قلـة حـلاه وطيحـة اسعـاره
يشوف اللي نظم بيتين والقيفـان مصروعـه
يعاند من غـدى منجـم جواهرهـا وبيطـاره
يحسب الشعر عسر القاف مهما ضاع منفوعه
وقافن بايخـن معنـاه قافـن طـاح مقـداره
وطول القاف مايشفع لشعرن ضاع موضوعـه
اذا ماكان يبـدع مـن فنونـه شـان تكـراره
كثير من العرب صارت بقولة عاش مخدوعـه
لانه شاور اللي بالعـرب ماتصـدق اشـواره
وترى القيفان ماتكسر رجالـن دوم مرفوعـه
ولا ترفـع ردي النـاس مهمـا زاد دينـاره
لك الله لو حروف المدح والشعـار مجموعـه
فلا تقدر تغطي ضوح شمس القيـظ وانـواره
كريم النفس مهما قيل يبقـى طايلـن بوعـه
وراع الطيب مايهفيه عـج الصيـف وغبـاره
وترى اللي يهفي المخلوق ذل النفس وخضوعه
وقول الشعر عند اللي يتابع صـوت مزمـاره
حلا القيفان لاصارت بنـار الضيـم مدفوعـه
وتنبع من عروقن فات لـه عاميـن منهـاره
يقول الشعر من يرجف خفوقه زايـدن روعـه
وخايف من زعل حاكم وقاله يشـرح اعـذاره
او اللي ضاق بهروجن بكذب الناس مشفوعـه
يبي يكشف لخلق الله ردات الكذب واضـراره
او اللي مات له غالي مـن الدانيـن بربوعـه
حزينن لاطرى زوله يهيض الجاش باشعـاره
او اللي حالته مثلي قضى ليلـه علـى كوعـه
سبايب عندلن وسط الضمايـر تلتهـب نـاره
هنوفن في ربيع العمر سوداء عيـن مربوعـه
عيون الريم وخـدوده بياضـه تقـل جمـاره
خذت عقلي وحطت في خفوق اهل الهوى لوعه
ولا ادري وش سبب غيبة علوم الزين واخباره
اراجي شوفته حزة غياب الشمـس وطلوعـه
الا واجرح من يشكي همـوم الغبـن بديـاره
جحيم النار في روحن بهجر الولف مفجوعـه
تنام الناس وهجوسي بوسط الصـدر محتـاره
بروحي جمرتن تمنع رقود العيـن وهجوعـه
مع ان الياس غامرني من الغالـي ومسيـاره
طفت عقبه مصابيح الحشى والروح وشموعـه
وشفت النار في قلبن شكى من قلـة انصـاره
اصيح وصيحتي ماهي لراع الطيب مسموعـه
زمانن صار جار البيت يجهل وش بلاء جـاره
واخبر الجار مايشبع وجاره يشتكـي جوعـه
وهذا طبع من يتبـع كـرام النـاس وخيـاره
هموم الناس في ماله وطيب انتاج مشروعـه
ولا همه قريبن صاح يشكـي حـر مسمـاره
واذا صارت خصال الطيب بين الناس مقطوعه
فلا تصبر بـدار الظلـم والحاسـد ومنشـاره
ترى الارزاق من دار الحسد والظلم منزوعـه
ورزقك من كفوف اللي يغيث القـاع بامطـاره

منقول

واذا صارت خصال الطيب بين الناس مقطوعه
...............................................ز.. فلا تصبر بـدار الظلـم والحاسـد ومنشـاره
ترى الارزاق من دار الحسد والظلم منزوعـه
.............................................ورزقك من كفوف اللي يغيث القـاع بامطـاره
.................................................. ..................................................

تسلم اخوي وصح لسانك درر وحكم ماشاء الله

ابن بليهد

اولا ونعم فيك طال عمرك

وثانيا اعتذار لك وللجميع

القصيده مش لي لواحدن اسمه
ابن غسلان واعتقد فواز وكنت دايم اسمع عنه
ولمن قريت قصيدته عرفت انه شاعر ماهو بهين شرواك

ونزلت القصيده بدون سابق قصد متعود كل المنتديات اللي
مسجل فيها فيها اقسام للقصايد المنقوله وتوي جديد في هالمنتدى الشامخ
بس الى هالحين ماعرفت القسم هذا يشمل الخاص والمنقول ولا لا ؟؟؟؟

الوكاد ما اطول الكلام عليك انت حر وبالاشاره تفهم
واتمنى اعتذاري يوصل للجميع قراء وزوار وسلامتن تسلم وجهك

وصح الله ابدنك وبدن شاعر القصيده يا ذيبان

وبيض الله وجهك على جيتك
اللي ذكرتني ذكرك الله بالشهاده

واذا صارت خصال الطيب بين الناس مقطوعه
فلا تصبر بـدار الظلـم والحاسـد ومنشـاره
ترى الارزاق من دار الحسد والظلم منزوعـه
ورزقك من كفوف اللي يغيث القـاع بامطـاره
:
:
صح لسان شاعرهااا
وسلمت أخوي على النقل المميز
تقديري لكـ
:
:

أبيات في قمة الرووووعه

صح لسانك أخوي ابورشيد على القصيدة الجميلة

والله يعطيك العافية