ياقدس قـلــّـت في زمنـّـا الشهامه = وحنا هل التوحيد وابنـــاء الاسلام
طفل ٍ خذوه وكسروا له عظامه = وصقر ٍ نطحهم حكموا له بالاعدام
وطفل ٍ قتيل ٍ قبل حتى فطــامه = وإلا الارامل والثكالى والايتام
وين المروه والشرف والكرامه = وين الشجاعه والاخوه والإقدام
ياويل حالي كيف نرجي السلامه = والعار لاحقنا له اعوام واعوام
ياليتني ياقدس لجلك حمامه = وآقف علشانك على روس الانام
وشخص ٍ طعن جوفي بقسوة كلامه = وانا جروحي بالحشا كنه الغام
ان كان هو مرتاح والليل نامه = الشاهد الله لجلك الجفن مانام
انا اقدر امحي من الوجود احترامه = لاشك انا مانزّل الراس لاقزام
امشي بدربي وانطح ألفين هامه = وآطــى على الاشواك وماشيل الاقدام
ماهي المراجل بالعـِـقـِـل والعمامه = ولاهي بشارب ورزه وزين هندام
بعض الرجال للذل والجبن خامه = ومره على البحرين ومره على الشام
وإلا بعضهم للرجوله علامه = وتاج ٍ على راسي على طول الايام
وأنا فتاة ٍ حرفها هو حسـامه = حـرَّه ودمّـي يحترق لجل الاســلام