ياجود خلي باب الاحزان مسدود=لاتفتحين الباب تكفين خليه
لاتفتحين الجرح وايامه السود=ولاتقربين القلب مافيه مكفيه
الكون موحش والفضا ضاق ياجود=والنفس من زود الألم صابها تيه
العمر لحظه والبقى قبر ولحود=والحزن غابه وغاير الجرح يغريه
إن قلت مابي شي وايامي سهود=تفضحني العبره الى قلت وابكيه
ويطيح مزن العين عنقود عنقود=لامن طرالي بالزمن بعض ماضيه
أيام فاتت ياهي أيام وعهود= ماكنت أحسب العمر تبخل لياليه
ياما زرعت بصفحة أيامي ورود=وياما جنيت الشوك وايدي تسقيه
وقتي كسرني ماعرف فيني حدود=أربع جهات تشوهت منه تشويه
وسمني الحرمان وعيوني شهود=طلي بها شوفي قساه وتجنيه
مره شربته وابيض القلب مولود=ماله على حمل الألم صبر ينجيه
وجروحي اللي كنها طلع منضود=تكبر مساحتها وانا اموت واتيه
ويصيح حرفي آآآه من قلب ياجود=وغيري يقول الله يابنت غنيه
واسكت وانا في داخلي نار بارود=لهيبها يسري مع الدم شوفيه
صار النفس دخان والنار في زود=تسعر بجوف(ن) مجمر الهم يكويه
واقلبي اللي بالشقا صار موعود=كنه على جمر الغضا عاقد ايديه
واعيني اللي تسكب الدمع وتجود=عبايرنً لو مرت طويق ترويه
واكلي اللي صار ضايع ومفقود=مابين عمر(ن) مات وجروح تحييه
ودام الحكي ياجود لي فيه منقود=خليني أبقى ساكته دوم مااحكيه
ومهما حكيت وقلت للناس ملهود=الجمر مايحرق سوى رجل واطيه
الصبر كنه عن خفا القلب مطرود=مهدور دمه والتناهيت تنعيه
يالغاليه وان شفتي الحال مهدود=لاتسأليني ليه ؟ وش صار ! وش فيه!!
الله كفيل يبدل الحال وتعود=للخافق المحروم بسمة آشافيه
وقلب(ن) مقيد من عنا الوقت بقيود=لابد من يوم(ن)عنا الوقت يجفيه ..