السلام عليكم ورحمة الله وبركاته ...
اولا ً أتشرف باانضمامي لمنتداكم الرائع وارجوا ان اقدم
مايعجبكم اما بقصائدي او بمشاركاتي ........
ثانيا ً: ايها الاخوه اقدم لكم هذه القصيده الرثائيه المتواضعه
برجل كريم ونبيل في تعامله مع كل من عرفه رجل ذوخلق رفيع
لايبلغ القلم قدره مهما كتبت ..........
رجل كريم لايمكن للحروف ان تبلغ اوصافه مهما نمقتها وحاولت
صفها ................
هوعبد الرحمن محمد الراضي من سكان مدينة حائل رحـــمه الله
رحمه واسعه وادخله مدخل صدق ٍ عند مليك ٍ مقتدر .................
لااطيل عليكم واترككم مع القصيده :
يالله يامنشي حقوق المخايل = ياللي لحكمه تخضع الخلق ماتحيل
يالواهب المعطي رجا كل سايل= يامغيث خلقه عقب الامحال بالسيل
ياعالم(ن) في دقها والجلايل = ياوامر عباده بحجه وتهليل
يالله انا طالبك ياابا الفضايل=ياغافر الزلات يادامح الميل
انك تبيح اللي حليْه قلايل = راع الكرم والجود سمح المقابيل
(( أبو محمد مقدم اولاد وايل ))=ريف الضعافا والرجال المشاكيل
له مجلس(ن) يجمع عيال الحمايل = مع دلة (ن) يزهابها البن والهيل
ولاقدْم لضيفان بيته هزايل =مايقلطون الا على جزلة (ن) حيل
طبعه على طبع الجدود الاوايل = طبيعة (ن) ماهي نفاق(ن) وتمثيل
ماهو مثل من للمديح يتحايل=لااجل المدايح زوْد الصاع بالكيل
وان ماحصل له مدح شفت النكايل = يبور من عقب الصخا والطهابيل
والا دحيم امير جود وجمايل = يمشي على الواجب ولو به بهاذيل
كريم نفس وشاهده كل طايل = له ماقف (ن) معنا كرامه وتبجيل
حافي قدم يمشي بوقت القوايل = متعرض(ن) درب الخطر والغرابيل
سوْا بنا معروف واف الخصايل = ولايجحد المعروف غير الهراميل
طلق اليمين ومدته للجزايل = ياويش اعد ْ ووش تعد الرجاجيل
تقريب خمس شهور نقص وكمايل = من حولها مدري زياده وتقليل
وقع الخبر من جاه موجس ملايل = مابطل النشده نهاره مع الليل
يرجي عسى في خير والشر زايل = ينشد عن اللافي عسى قاوي الحيل
مرحوم ياخيرة كرام السلايل = ياطيْب السيره وريث الحلاحيل
حاز النعم مدبول والكل قايل =يانعم يانعمين في كل ماقيل
تبكي على فرقاه ضلعان حايل = ويبكي عليه ترابها والمقاييل
وتبكي عليه شعابها والمسايل= وتبكي عليه اشجارها والمحاصيل
وتبكي عليه افرادها والقبايل=وعليه تبكي دلته والفناجيل
وتبكي على ذكراه طيب الفعايل = وعليه تبكي شبته والمعاميل
وانا عليه ابكي ودمعي همايل=من جوف عيني هل دمعي هماليل
معذور يوم ابكي فريد العمايل=اللي ضوى نجمه مثل ضيْة سهيل
واليا انذكر بالطيب فيها دلايل = ماهو كلام يقال والا تهاويل
عز الله انه حاز كل الجمايل = بالواجبات وزاد ها بالتنافيل
والموت حق ودرب كل الفصايل = كل (ن) على موته اليا حان بيحيل
كل الملا تبغى تشد الرحايل=ولاباقي الاوجه داحر هل َ الفيل
الوالي اللي عادل (ن) كل مايل = اللي بحكمه كل خلقه مماثيل
الا بتقوى جانبه والمثايل = يالله تحمانا بجاهك عن الميل
عسى لنا من فيض جودك فضايل = وعسى لنا في رحمتك زود تفضيل
وعسى الفقيد لدمحة الذنب نايل = عسى المقرْ جنان خلد المظاليل
عساه بين وروودها والخمايل = يارب توهب له صدوق المداخيل
اللي كسب حب العرب والعوايل = في كل ديره له ربوع وتعاليل
اللي حضر واللي يبث الرسايل = واللي يكفكف دمع عينه بمنديل
وقت(ن) يلوْعنا بشوف الهوايل = نبكي لنا جيل (ن) ويبكوننا جيل
هذي هي الدنيا وفوود ورحايل = وعسى سعدنا بالليالْ المقابيل
يعلم الله انها قليله بحق ابو محمد( رحمه الله )ولكن لابد
من تسطير المشاعر فاان حصل تقصير فهو مني وان جاء
عذر فهومنكم وأللتمسه ... وتقبلوا تحياتي وتقديري .. بدرعيد ..
مرثيه بالراحل المغفور له بااذن الله تعالى (( عبدالرحمن محمد الراضي )) .. 
العرض العادي
