السلام عليكم ورحمة الله وبركاته
نقلت لكم هذه القصيده تعبيرا عن اعجابي بها .. متنيا ان تنال شيئآ من ذائقتكمـ الراقيه
لكم الابيات...
..
العـوض بالله ياعيـنٍ تنتظـر جمـع الحبايـب=أمنيتها والله اعلـم مـن سـرابٍ.. فـي سـراب
عـدّة شهـورٍ تنقّـل مـن مصايـب لمصايـب=تذرف دموع الفراق .. وذاقت اشكـال العـذاب
الفراق اللي شكـاه الغيـر مـع ذكـر السبايـب=هـو سبـب همّـي ولكـن مالفرقانـا اسبـاب
أكتم همومي بصـدري مـادروا حتـى القرايـب=خوفي انهم من غلايـه يفتحـون الفيـن بـاب
لنّـي ادري ماهـي الا رحلـةٍ فيهـا غـرايـب=قبـل لاتبـدا وكنّـي قـاريٍ عنـهـا كـتـاب
لكـن انّـي اتّكلـت وشفـت فالرحلـه عجايـب=التهور من فروض الحـبّ فـي سـن الشبـاب
الفتاه اللي هدتني مـن طـرف ذيـك الذوايـب=آخـر اللـي امتلكتـه منّهـا قـبـل الغـيـاب
وانستني يومي ارجع للـورى واصيـر طايـب=استعيـد ايـام حلـوه عشتهـا دون اكتـئـاب
واجرحتني يوم اشوف اليوم وش به من خرايب=عقب لقيا عقب فرحه صارت الدعـوى خـراب
من ملكت الحب منها صار من جـزل الوهايـب=ومن فقدّت الوصل كنّـي فاقـدٍ اغـلا الرقـاب
اشهد ان فيها الجمال اللي بهـا مفتـون ذايـب=والوصايـف للحبيبـه مـن ذهـاب بـلا أيـاب
شعرهـا غطـا قفاهـا ليـل تكسـاه السحايـب=ووجهها من نور شمسٍ دونهـا ركمـة ضبـاب
لاوقفت مثـل الزعيـم اللـي تكفّـل بالكتايـب=ولامشت كنها الجموح بلارسـن جفلـه تهـاب
والجبين ليـا بـدا كـن البـدر تايـب وهايـب=من سطوعه لاظهرت له .. استحى منها وغـاب
والشفايف لاضحكت لي ضعت من عرض النهايب=من شعوري صار رأيي مغـديٍ درب الصـواب
والعذايب رصف لولو غير عـن كـل العذايـب=له علاقه مع بياض الثلج مـن فـوق الهضـاب
خشمها سلـة حسـام الشيـخ فكّـاك النشايـب=ذاك جدّي يـوم كسّـب ربعـه خيـار الركّـاب
وفالعيون الغـاز يبطـل رمعهـا تفكيـر شايـب=ساكب الله نص زين الكـون فالعيـن انسكـااب
نقطـه لضعفـي نحرهـا والروايـح بالترايـب=ريح مسكٍ مفعمٍ بالعـود واحسـب لـه حسـاب
لااايمي . كف العبث ماعـاد بالطـاري طلايـب=ناس قبلك عاذلتني ..<<< شوفها تاكـل تـراب
الشاعر / ياسر علي الفليو
.... العوض باللّه .... 
العرض العادي
