يامحلا السجة مـع البـر للصـدر الكتـوم
في فياض(ن) يدله البال مـع يشمومهـا
علها وبل الحيـا مـن مبـدرة الوسـوم
مزنة(ن) غـرا تداحـم قنـوف غيومهـا
يرتوي منها وطا الارض وتقض الحـزوم
وبلهـا ودان مـا ينقـطـع ديمومـهـا
ترجع الارض المحل من عطا الرب الرحوم
وتانس النفـس الشقيـة بنفـح نسومهـا
المحاجر فايضـه والطيـور ابهـا تعـوم
وام سالم تنـزل وتعتلـي فـي حومهـا
بهجة اللي وسط صدره كما لفح السمـوم
مبطـي ونفسـه تزايـم ثقـال همومهـا
الفيافي مخضره والسمـا مـردم غيـوم
والنفوس الساليه غاطسـه فـي نومهـا
ما يحجب الشوف مبنـى ولا قلـة يمـوم
ديرة(ن) كـل يسولـف بطيـب ريومهـا
مدهل بكار(ن) لعود(ن) مقـدر ومحشـوم
في هواها النفس تشقى ولاحـد يلومهـا
غاليه واتلاد من يـوم زرقـات السهـوم
تشبـح النظـرة بهاذيـك هـذي تومهـا
ما سجع بالصوت دلالهـا يامـن يسـوم
ولا شراها من بغاهـا مـع اول سومهـا
لاعرضت قامت تبختر بممشـى فيـه زوم
ومن مواطيها الصغيرة عجـل درهومهـا
منفهـق سنامهـا ناسـع الغـارب ردوم
مايـل(ن) عرقوبهـا منهـدل خرطومهـا
ارقبـه سنـاد والخـد راهـي ومعـدوم
والاذانـي شـرف دون الفتـر بوقومهـا
تدهشك لامنها جت مـن المبـرك تقـوم
تمتعـك بقيامهـا كنـه احـد يهومـهـا
ذيلها وقم الشبر والوبر حسـك(ن) بـروم
صورة(ن) تشدى السحابـه ورا تنعومهـا
راهيات الطـول سنـاد وكبـار الجـروم
نادرات(ن) ما تضاهـى بكبـر جرومهـا
شامة(ن) بذيالها كبـر بصمـات البهـوم
وشامة(ن) في وقمها مثلهـا بخشومهـا
وسمها المشعاب وان جا التفاخر بالوسوم
جنبت عيـن الحسـد زاهيـات وسومهـا
ما حلا لا كفهـا صـوت مودهـا قـدوم
وعقـب مـا تفاوقـت درت بمغنومـهـا
مع عتيم الليل والضو وهـاج(ن) شعـوم
وامهـات الخيـر تجتـر فـي مطعومهـا
بصحبة اللي فالنوايـب يسـدون اللـزوم
استدارت دلـة الكيـف عقـب اولومهـا
وابتدا حذف الشمغ وابتـدا سـرد العلـوم
ونسيت النفس الشقيـة جميـع همومهـا
قصيدة (( يا محلا السجه )) سعود القت 
العرض العادي
